គំនិតខ្លីៗតាមវិធីវិទ្យាសាស្ត្រ ដើម្បីជាទុនសម្រាប់ធ្វើឱ្យអ្នកឆ្លាតជាងមុន
ខាងក្រោមនេះជាគំនិតខ្លីៗ ដែលជាលទ្ធផលនៃការស្រាវជ្រាវផ្នែកចិត្តសាស្ត្រ និងវិទ្យាសាស្ត្រខួរក្បាល (neuroscience) ដកស្រង់ដោយគេហទំព័រ inc.com ដើម្បីជាជំនួយបង្កើនសមត្ថភាព និងភាពឆ្លាតវៃរបស់អ្នក។
១) ត្រូវជឿថា វាអាចសម្រេចទៅបាន យោងតាមការសិក្សាដែលចុះផ្សាយដោយគេហទំព័រ The New York Times តាមរយៈការធ្វើការស្ទង់មតិមួយបង្ហាញថា នៅពេលដែលយើងមានជំនឿថា «វាអាចទៅរួចដែលយើងអាចក្លាយជាមនុស្សឆ្លាតជាងមុន» នោះវាអាចជាចំណែកមួយធ្វើឱ្យមនុស្សឆ្លាតជាងមុនបានពិតមែន។ តាមលទ្ធផលវិទ្យាសាស្ត្រគឺថា នៅពេលមានជំនឿបែបនេះ ខួរក្បាលរបស់អ្នកកាន់តែ សហការ (cooperative) ដែលធ្វើឱ្យណូត្រុងកាន់តែមានទំនាក់ទំនង។
២) ធ្វើ socialize ឱ្យបានញឹកញាប់ ការធ្វើទំនាក់ទំនងដូចជាការការនិយាយជាមួយគ្រួសារ និងមិត្តភ័ក្ដិ អាចនឹងបង្កើនភាពឆ្លាតវៃរបស់អ្នកបាន។ ទំនាក់ទំនងកាន់តែច្រើន អ្នកនឹងដឹងពីពិភពខាងក្រៅកាន់តែច្រើនដែលនេះជាចំណែកមួយពង្រឹងខួរក្បាលឱ្យកាន់តែប្រសើរជាងមុន។
៣) ហាត់ប្រាណឱ្យបានញឹកញាប់ និយាយបែបខ្លី ការហាត់ប្រាណ គឺមិនត្រឹមតែធ្វើឱ្យសារពាង្គកាយរបស់អ្នករឹងមាំជាងមុននោះទេ ប៉ុន្តែ សមត្ថភាព និងខួរក្បាលរបស់អ្នកកាន់តែប្រសើរឡើងថែមទៀតផង។ វាអាចកម្ចាត់ភាពតប់ប្រមល់ ដែលអាចធ្វើឱ្យខួរក្បាលរបស់អ្នកកាន់តែស្រឡះងាយទទួលយករឿងថ្មីៗ។
៤) ញ៉ាំតែ ឬកាហ្វេ សារធាតុកាហ្វេអ៊ីនមិនអាក្រក់នោះទេ សម្រាប់សារពាង្គកាយរបស់អ្នក។ តាមការស្រាវជ្រាវបង្ហាញថា សារធាតុកាហ្វេអ៊ីនអាចកម្ចាត់ឥទ្ធិពលនៃអាដេណូស៊ីន ដែលជាប្រូតេអ៊ីនមួយធ្វើឱ្យខួរក្បាលវិវឌ្ឍន៍យឺត។ អាដេណូស៊ីនកាន់តែតិច នឹងធ្វើឱ្យខួរក្បាលរបស់អ្នកកាន់តែឆ្លាតជាងមុន៕
ដោយ៖ រតនៈវិភូ
