ថ្នាំទិព្វបីយ៉ាងងាយស្រួលរក ដើម្បីធ្វើជាអ្នកដឹកនាំធ្វើការដោយប្រសិទ្ធភាព លោកអ្នកគួរដឹង
ការធ្វើជាអ្នកដឹកនាំដ៏អស្ចារ្យដែលបំពេញការងារប្រកបដោយប្រសិទ្ធភាព កើតចេញពីមូលដ្ឋានគ្រឹះច្រើនយ៉ាង។ ដោយឡែកថ្ងៃនេះ គេហទំព័រ bizkhmer សូមបង្ហាញចំណុចបីយ៉ាងសាមញ្ញៗ ដែលមេដឹកនាំអស្ចារ្យបានប្រកាន់យកដើម្បីបំពេញការងារប្រកបដោយប្រសិទ្ធភាពខ្ពស់។
១) ជាមនុស្សមានសមានចិត្ត មេដឹកនាំអស្ចារ្យ មានសមត្ថភាពដើម្បីស្វែងយល់ពីបញ្ហារបស់មនុស្ស និងសម្ដែងក្ដីបារម្ភដែលផុសចេញពីចិត្ត និងអារម្មណ៍ពិតៗ។ អ្នកដឹកនាំប្រើមេត្តាធម៌របស់ខ្លួនដែលជាមូលដ្ឋានគ្រឹះដើម្បីដឹកនាំបុគ្គលិកឆ្លងកាត់ឧបសគ្គ និងបញ្ហាប្រឈមផ្សេងៗ។ នៅពេលមានបុគ្គលិករអ៊ូរទាំ ឬត្អូញត្អែររឿងអ្វីមួយ មេដឹកនាំនោះចេះស្ដាប់ និងឆ្លើយតបទៅនឹងក្ដីបារម្ភរបស់បុគ្គលិក។ មេដឹកនាំនេះ តែងតែស្វែងរកមធ្យោបាយដើម្បីសម្រេចជោគជ័យរយៈពេលវែង សម្រាប់ស្ថាប័នរបស់ពួកគេ។
២) មានជំនាញក្នុងការផ្តោតអារម្មណ៍ទៅលើកិច្ចការខ្ពស់ មេដឹកនាំដ៏អស្ចារ្យគឺចេះតម្រូវទិសស្របទៅតាមទស្សនវិស័យមួយច្បាស់លាស់។ ពួកគេមានសមត្ថភាពក្នុងការរៀបចំ បង្កើតយុទ្ធសាស្ត្រ និងកំណត់ផែនការប្រកបដោយប្រសិទ្ធភាពដើម្បីប្រឈមទៅនឹងឧបសគ្គ។ មិនមែនមានជំនាញតែផ្ដោតទៅលើបញ្ហានោះទេ ប៉ុន្តែ មេដឹកនាំប្រភេទនេះចេះបង្រៀនបុគ្គលិកក្រោមបង្គាប់ឱ្យចេះផ្ដោតទៅលើការបំពេញការងាររបស់ពួកគេ ដែលអាចបំពេញការងារប្រកបដោយឯករាជ្យបាន។
៣) មេដឹកនាំប្រភេទនេះស្វែងយល់ច្រើនពីអ្នកដទៃ បើទោះបីជាពេលខ្លះ យើងដឹងរឿងច្រើនយ៉ាងណាក្ដី ប៉ុន្តែដើម្បីស្វែងយល់ពីបញ្ហារបស់អ្នកដទៃឱ្យបានដឹងប្រាកដនោះគឺត្រូវការ និងទាមទារពេលវេលាវែងឆ្ងាយបន្តិច។ ប៉ុន្តែមេដឹកនាំដ៏អស្ចារ្យគឺដឹងយ៉ាងច្បាស់ពីចំណុចខ្លាំង និងចំណុចខ្សោយរបស់មនុស្ស ហើយពួកគេតែងតែផ្ដល់ការហ្វឹកហាត់ការងារ និងការបណ្ដុះបណ្ដាលតាមតម្រូវការ។ មេដឹកនាំអស្ចារ្យក៏ដឹងយ៉ាងច្បាស់ពី ចំណុចខ្លាំង និងចំណុចខ្សោយរបស់ខ្លួនគេយ៉ាងច្បាស់ និងជ្រើសរើសបុគ្គលិកក្រោមបង្គាប់មកបំពេញចំណុចខ្វះខាតដែលចាំបាច់ដើម្បីបំពេញ៕
ដោយ៖ រតនៈវិភូ
