តាមសេចក្ដីរាយការណ៍ថ្មីចុងក្រោយអំពីស្មាតហ្វូនកំពូលប្រភេទ Gaming Phone របស់ Xiaomi ដែលរំពឹងថា នឹងមានឈ្មោះ Black Shark ពីគេហទំព័រ gsmarena បានបង្ហាញវីដេអូរយៈពេលខ្លីប្រមាណត្រឹម ៣វិនាទីប៉ុណ្ណោះ ដែលអះអាងថា ជាទូរស័ព្ទ Black Shark នេះតែម្ដង។
កាលពីពេលថ្មីៗនេះ យើងធ្លាប់បានឃើញលក្ខណៈសម្បត្តិសំខាន់មួយចំនួនរបស់ Black Shark នៅលើការធ្វើតេស្តសមត្ថភាព benchmarks ចំនួនពីរ រូបរាងបែកធ្លាយ ហើយពេលនេះ យើងនឹងបានឃើញវានៅក្នុងវីដេអូរយៈពេលខ្លីមួយ ដែលជាវីដេអូចាប់កាន់។ ថ្វីបើរយៈពេលខ្លី ប៉ុន្តែយ៉ាងហោចណាស់ យើងបានឃើញរូបរាងបង្វិលជុំ ទាំងផ្ទៃមុខ និងផ្នែកខាងក្រោយរបស់វា។
សង្កេតឃើញរាងរៅទូរស័ព្ទ មានមាឌធំគួរសម មានប៊ូតុង Home នៅខាងមុខ និងឌីហ្សាញផ្នែកក្រោយបែបកាត់ជ្រុង និងរាបស្មើនោះទេ ហើយរចនាបែបជម្រាលចុះ ដែលស័ក្ដិសមជាស្មាតហ្វូនកាច កម្លាំងខ្លាំង។ បើតាមការបែកធ្លាយរូបរាងកន្លងទៅ លើកឡើងថា Black Shark នឹងប្រើឈីប Snapdragon 845 មាន RAM 8GB និងអង្គចងចាំចាប់ពី 32GB ឡើងទៅ។ អេក្រង់នឹងមានកម្រិត resolution ទំហំ 2160x1080px សមាមាត្រ 18:9 aspect ratio។ ក្រុមហ៊ុន Xiaomi អាចនឹងសម្ពោធ Black Shark ផ្លូវការនៅថ្ងៃទី១៣ មេសានេះ៕
សូមអាន៖ Xiaomi លេងមែនទែន មិនត្រឹមជាក្រុមហ៊ុនទូរស័ព្ទឈានមុខ ឥឡូវថែមទាំងផលិត Gaming Laptop ទៀត!
ដោយ៖ រឹទ្ធិរាជ
