គំនិត ៣យ៉ាងដែលអាចជួយម្ចាស់អាជីវកម្មថ្មីថ្មោង សម្ភាសជ្រើសរើសបុគ្គលិកដែលស័ក្ដិសមបាន
នៅពេលចាប់ផ្ដើមអាជីវកម្ម ការសម្ភាសជ្រើសរើសបុគ្គលិកគឺជាដំណាក់កាលដ៏សំខាន់មួយ ហើយវាក៏មានផលលំបាកជាច្រើនដែរ ជាពិសេសគឺជាការសម្ភាសបែបណាទើបទទួលបាននូវមនុស្សដែលពិតជាស័ក្ដិសមសម្រាប់អាជីវកម្មរបស់អ្នក។ បើអ្នកកំពុងតែមានបញ្ហានេះ គំនិតចំនួន៣ខាងក្រោមនេះអាចជួយអ្នកក្នុងការដោះស្រាយបញ្ហានេះបាន៖
១) បណ្ដុះនូវវប្បធម៌ក្រុមហ៊ុនរបស់អ្នក៖ ជាទូទៅម្ចាស់អាជីវកម្មភាគច្រើនតែងផ្ដោតសំខាន់ទៅលើគុណសម្បត្តិរបស់អ្នកមកសម្ភាសសុំការងារដែលមានដូចជា សមត្ថភាព ជំនាញ និងបទពិសោធន៍ជាដើមនេះ ដោយមិនសូវបានយកចិត្តទុកដាក់ទៅលើការបណ្ដុះនូវវប្បធម៌ដែលជាគោលការណ៍និងសសរគ្រឹះដ៏រឹងមាំមួយសម្រាប់ទ្រទ្រង់នូវអាជីវកម្មរបស់គេនោះឡើយ។ វប្បធម៌ក្រុមហ៊ុនមានសារសំខាន់ណាស់ ព្រោះថាបើអ្នកមិនគិតគូរយកគោលការណ៍អ្វីមួយជាគោលសម្រាប់ត្រួសត្រាយផ្លូវដើររបស់ក្រុមហ៊ុនអ្នកទេ នោះអ្នកក៏ពិបាកនៅក្នុងការដើរឆ្ពោះទៅមុខ និងពិបាកក្នុងការទាក់ទាញយកបុគ្គលិកណាដែលស័ក្ដិសមពិតប្រាកដសម្រាប់អាជីវកម្មអ្នកនោះដែរ។
២) ត្រួតពិនិត្យបញ្ជាក់ឡើងវិញនូវការអះអាងរបស់អ្នកសម្ភាសសុំការងាររបស់អ្នក៖ មនុស្សអាចប្រើប្រាស់វិធីសាស្ត្រច្រើនបែបដើម្បីទាក់ទាញអ្នកមកចាប់អារម្មណ៍ទៅលើពួកគេ បើទោះជាព័ត៌មានដែលពួកគេរៀបរាប់អំពីខ្លួនឯងនោះគឺជាព័ត៌មានប្រឌិតឬមានលក្ខណៈបំផ្លើសពីការពិតជាក់ស្ដែងក៏ដោយ។ ហេតុនេះ វាជាការចាំបាច់ណាស់ដែលអ្នកគួរតែធ្វើការត្រួតពិនិត្យបញ្ជាក់ឡើងវិញនូវអ្វីដែលអ្នកសម្ភាសសុំការងាររបស់អ្នកសរសេរក្នុងពាក្យសុំការងារ និងអ្វីដែលពួកគេប្រាប់អ្នកក្នុងការសម្ភាស ដោយអាចសាកសួរអ្នករួមការងាររបស់ពួកគេឬជាគ្រូមកពីសាលាដែលពួកគេធ្លាប់រៀនក៏បាន។
៣) ផ្លាស់ប្ដូរសំណួរសម្ភាសរបៀបចាស់ដដែលៗពីមុនចេញ៖ បើអ្នកសួរតែសំណួរដដែលៗតាមទម្លាប់ដូចគេដូចឯងដែលធ្លាប់តែមានក្នុងការសម្ភាសការងាររបស់ក្រុមហ៊ុនដទៃៗមក នោះអ្នកអាចនឹងទទួលបាននូវចម្លើយដែលមានលក្ខណៈភូតកុហកបាន ព្រោះថាអ្នកសម្ភាសសុំការងាររបស់អ្នកនឹងបានត្រៀមខ្លួនរួចជាស្រេចសម្រាប់ចម្លើយឆ្លើយតបទៅកាន់ការសួររបស់អ្នកវិញបានយ៉ាងល្អ។ នេះនឹងមិនអាចធ្វើឲ្យអ្នកទាក់ទាញយកបាននូវមនុស្សដែលពិតជាស័ក្ដិសមសម្រាប់រួមផ្លូវជាមួយគ្នាក្នុងការចាប់ផ្ដើមអាជីវកម្មដំបូងនោះឡើយ។ ហេតុនេះ អ្នកគួរតែពិចារណាឲ្យបានម៉ត់ចត់ចំពោះសំណួរដែលអ្នកនឹងត្រូវសួរទៅកាន់ពួកគេ៕
ដោយ៖ ស្រីពៅ
