សហគ្រិនកម្ពុជា នឹងចូលរួមក្នុងសមាជសហគ្រិនពិភពលោក (Global Entrepreneurship Congress)
អ្នកឧកញ៉ា សុខ ពិសិទ្ធ ប្រធានបណ្ដាញសហគ្រិនភាពពិភពលោកប្រចាំនៅកម្ពុជា និងជាប្រធានក្រុមប្រឹក្សាភិបាលផ្នែកពិគ្រោះយោបល់នៃសមាគមសហគ្រិនវ័យក្មេងកម្ពុជា (YEAC) នឹងដឹកនាំគណៈប្រតិភូកម្ពុជាដើម្បីចូលរួមក្នុងសមាជសហគ្រិនពិភពលោក(GEC)លើកទី១០។ សមាជនេះនឹងប្រព្រឹត្តទៅពីថ្ងៃទី១៦ ដល់១៩ ខែមេសា ឆ្នាំ ២០១៨ នៅទីក្រុង អ៊ីស្តាន់ប៊ុល ប្រទេសតួគី។ នេះបើតាមការចុះផ្សាយពីគេហៈទំព័រផ្ទាល់ របស់សមាគមសហគ្រិនវ័យក្មេងកម្ពុជា។
សមាជសហគ្រិនភាពពិភពលោកគឺជាកម្មវិធីមួយ ដែលរៀបចំឡើងដើម្បី ឲ្យមានការជួបជុំគ្នារវាង អាជីវកម្មបង្កើតថ្មី លំដាប់កំពូលពីជុំវិញពិភពលោក ហើយក៏ជាកន្លែងសម្រាប់ សហគ្រិន វិនិយោគិន អ្នកសរសេរផែនការនយោបាយ និង អ្នកដឹកនាំកំពូលៗ ជួបពិភាក្សាគ្នាដើម្បី បង្កើតគំនិតក្នុងការរក្សា និង លើកកម្ពស់នូវកំណើនសេដ្ឋកិច្ច និងសុខុមាលភាពប្រជាជន។
ជំនួបនេះ នឹងមានការចូលរួមពីគណៈប្រតិភូ មកពី ១៧០ ប្រទេស ដើម្បីពិភាក្សាពី បញ្ហាប្រឈមផ្នែកសេដ្ឋកិច្ច និង នយោបាយដែលកើតចេញអំពីការរីកចម្រើននៃ ប្រព័ន្ធអេកូឡូស៊ីបែបសហគ្រិនភាព។
ចំពោះខួបលើកទី១០នេះ (GEC) នឹងធ្វើឡើងនៅទីក្រុង អ៊ីស្តាន់ប៊ុល ខណៈដែលជំនួបមុនៗ ធ្វើនៅទីក្រុងល្បីៗដូចជា៖ កាន់សាស់(2009), ឌូបៃ (2010), សៀងហៃ (2011), Liverpool (2012), Rio de Janeiro (2013), មូស្គូ (2014), Milan (2015), Medellin (2016) និង Johannesburg (2017)៕
ដោយ៖ វាសនា
