សញ្ញាទាំង ៥នេះ បញ្ជាក់ថាអ្នកនឹងអាចដើរទៅកាន់វិធីជោគជ័យឆាប់ៗនេះហើយ!
ផ្លូវទៅកាន់ភាពជោគជ័យ គឺវែងឆ្ងាយខ្លាំងណាស់ ជាហេតុមនុស្សជាច្រើនមិនងាយនឹងដើរទៅដល់នោះទេ។ ប៉ុន្តែបើអ្នកមានសញ្ញាទាំង ៥នេះ មានន័យថា អ្នកកំពុងដើរផ្លូវត្រូវ ហើយនឹងជោគជ័យឆាប់ៗ៖
១) អ្នកមានការងារដែលខ្លួនពេញចិត្ត៖ ថ្វីត្បិតមនុស្សភាគច្រើន ចង់បានការងារមួយស្ថិតស្ថេរសម្រាប់ផ្គត់ផ្គង់ការរស់នៅប្រចាំថ្ងៃ ប៉ុន្តែវាមិនគ្រប់គ្រាន់នៅឡើយ ប្រសិនបើអ្នកកំពុងតែធ្វើការដែលខុសពីបំណងរបស់ខ្លួន។ ផ្ទុយទៅវិញ បើអ្នកកំពុងធ្វើការងារដែលជាក្តីប្រាថ្នារបស់ខ្លួននោះ វាជាការជំរុញទឹកចិត្តមួយសំខាន់ធ្វើឲ្យអ្នកខិតខំបំពេញការងារនោះអស់ពីលទ្ធភាព ហើយលទ្ធផលជាផ្លែផ្កានឹងកើតឡើងឆាប់ៗមិនខាន។
២) អ្នកហ៊ានដើរលើផ្លូវដែលអ្នកដទៃគិតថា «ទៅមិនរួច»៖ បុគ្គលជោគជ័យធំៗក្នុងលោក សុទ្ធតែបានដើរលើផ្លូវដែលអ្នកដទៃមើលឃើញថា ទៅមិនរួច ពោលគឺដឹងតែបរាជ័យ១០០ហើយ។ ប៉ុន្តែជាលទ្ធផលបុគ្គលទាំងនោះ អាចជំនះបាន ហើយជោគជ័យយ៉ាងធំធេងបំផុតក្នុងជីវិត។ ដូច្នេះហើយ បើអ្នកកំពុងដើរលើផ្លូវមួយ ដែលមនុស្សទូទៅគិតថា មិនអាចទៅរួចនោះ សូមកុំបោះបង់ ឬ បាក់ទឹកចិត្ត ប៉ុន្តែត្រូវតែជំនះដើរទៅមុខ ព្រោះ មិនយូរមិនឆាប់ទេ អ្នកនឹងសម្រេចវាមិនបាន។
៣) អ្នកជឿជាក់លើខ្លួនឯង៖ ការជឿជាក់លើខ្លួនឯង គឺពិតជាសំខាន់ខ្លាំងណាស់ ព្រោះថាមុនពេលឲ្យអ្នកដទៃទុកចិត្ត គឺអ្នកត្រូវតែទុកចិត្តលើខ្លួនឯងជាមុនសិន។ នៅពេលអ្នកមានទំនុកចិត្តលើខ្លួនឯងហើយនោះ អ្នកអាចធ្វើកិច្ចការផ្សេងៗបានយ៉ាងមានប្រសិទ្ធភាពខ្ពស់ ព្រោះអ្វីដែលធ្វើនោះ គឺធ្វើអស់ពីកម្លាំងកាយចិត្តតែម្តង។
៤) អ្នកតែងមានផែនការច្បាស់លាស់៖ ប្រសិនបើ គ្រប់កិច្ចការដែលអ្នកបានធ្វើ គឺសុទ្ធតែមានផែនការច្បាស់លាស់នោះ ទោះបីជាជោគជ័យខ្លះមិនជោគជ័យខ្លះក្តី ប៉ុន្តែវាជាសញ្ញាមួយដ៏ល្អដែលបញ្ជាក់ថា អ្នកកំពុងដើរលើផ្លូវត្រូវ ក្នុងការឆ្ពោះទៅកាន់ភាពជោគជ័យក្នុងជីវិត។ ការធ្វើកិច្ចការដែលមានបន្ទាប់ និង គោលដៅច្បាស់លាស់ រមែងបានជោគជ័យឆាប់រហ័ស ព្រោះអ្នកដឹងច្បាស់ថា អ្វីគួរធ្វើ និង មិនគួរធ្វើ និង ដឹងពីគោលដៅដែលត្រូវដើរ។
៥) មិនចូលចិត្តនិយាយច្រើន តែធ្វើច្រើន៖ មនុស្សដែលអាចសម្រេចជោគជ័យបាន លុះត្រាតែអ្នកទាំងនោះសម្រាកនិយាយ ហើយចាប់ផ្តើមធ្វើវាតែម្តង ព្រោះបើរវល់តែនិយាយរហូត ហើយមិនឃើញមានសកម្មភាពអ្វីសោះនោះ គឺទៅមិនរួចនោះទេ។ ដូច្នេះហើយ ប្រសិនបើអ្នក ជាមនុស្សផ្តល់តម្លៃខ្លាំងលើសកម្មភាពជាជាងនិយាយឲ្យតែមើលទៅឡូយនោះ មិនយូរទេអ្នកនឹងអាចដើរទៅកាន់គោលដៅដែលចង់បានមិនខាន៕
ដោយ៖ អ៊ុន ភក្តី
