ស្មាតហ្វូន​ជំនាន់​ថ្មី OnePlus 6 ​ត្រូវ​គេ​រំពឹង​ថា នឹង​បង្ហាញ​ខ្លួន​នៅ​ចុង​ខែ​មេសា​នេះ​ហើយ ហើយ​យើង​ទើប​បាន​ឃើញ​រូប​បង្ហើប​នូវ​រូបរាង​សំបក​ខាង​ក្រោយ​របស់​វា​កាលពី​ពេល​ថ្មីៗ ចំណែក​ពេល​នេះ ក៏​មាន​លេច​ចេញ​វីដេអូ teaser ​នៅ​លើ​បណ្ដាញ​សង្គម Twitter ​ថែមទៀត។ យ៉ាងណា​វីដេអូ​ហាក់​មាន​ភាព​អាថ៌កំបាំង ហើយ​ក៏​មិន​ទាន់​ឃើញ​រូបរាង​ស្មាតហ្វូន​ស៊េរី​ថ្មី​នេះ​នៅ​ឡើយ ក្រៅពី​មាន​បង្កប់​ឃ្លា The Speed You Need 6 ប៉ុណ្ណោះ។

កន្លង​មក​នេះ យើង​បាន​ឮ​ដំណឹង​ចចាមអារ៉ាម​អំពី OnePlus 6 ​ថា​នឹង បង្ហាញ​ខ្លួន​ជាមួយ​អេក្រង់ ៦,២៨អ៊ីញ​ប្រភេទ AMOLED ​កម្រិត FHD+ resolution 2280x1080px ។ វា​នឹង​ប្រើ​ឈីប Snapdragon 845 ​អម​ដោយ RAM 6GB ​និង​អង្គ​ចងចាំ 128GB ។   https://twitter.com/twitter/statuses/980822167255441408   គេ​រំពឹង​ទៀត​ថា OnePlus 6 ​ក៏​នឹង​មាន​ជម្រើស RAM 8GB ​អម​ដោយ​អង្គ​ចងចាំ 256GB។ ​ស្មាតហ្វូន​ថ្មី​នេះ​នឹង​បំពាក់​មក​នូវ​ប្រព័ន្ធ​កាមេរ៉ា​ទំនើប​សមត្ថភាព​ខ្ពស់​ទាំង​កាមេរ៉ា​មុខ និង​កាមេរ៉ា​ក្រោយ។ កាមេរ៉ា​មុខ​អាច​មាន​ទំហំ 20MP ​ហើយ​ខាង​ក្រោយ​ជា​កាមេរ៉ា​ភ្លោះ ដែល​មួយ​មាន​ទំហំ 16MP ​និង​មួយ​ទៀត​ទំហំ 20MP ។ OnePlus 6 នឹង​ដំណើរការ​ដោយ​ប្រព័ន្ធ​សូហ្វ៊ែរ Android 8.1 Oreo ​ហើយ​មាន​កម្លាំង​ថ្ម 3400mAh ។ វា​នឹង​ត្រូវ​ក្រុមហ៊ុន OnePlus ​សម្ពោធ​ចេញ​ផ្លូវការ​នៅ​អំឡុង​ខែ​មេសា​នេះ៕ ដោយ៖ រឹទ្ធិរាជ ប្រភព៖ OnePlus / Twitter