ចំណុចសំខាន់ ៣យ៉ាងដែលអ្នកដឹកនាំគួរបណ្ដុះឲ្យមាននៅក្នុងខ្លួន
តើការដឹកនាំយ៉ាងដូចម្ដេចដែលអាចបណ្ដុះអ្នកឲ្យក្លាយជាមេដឹកនាំដ៏ល្អមួយរូបនៅក្នុងចិត្តរបស់កូនចៅបាន ? ខាងក្រោមគឺជាចំណុចសំខាន់ចំនួន៣ដែលអ្នកត្រូវបណ្ដុះឲ្យមាននៅក្នុងខ្លួន៖
១) មិនលើកខ្លួនឯងជាមេគេ៖ អ្នកដឹកនាំល្អមានការយល់ដឹងថាពួកគេស័ក្ដិសមជាអ្នកដឹកនាំដ៏ល្អពិតប្រាកដ គឺមិនបានស្ថិតនៅត្រង់មុខតំណែងដែលគេតែងតាំងឲ្យនោះទេ តែគឺស្ថិតនៅត្រង់សមត្ថភាពនិងអត្តចរិតនៅខាងក្នុងរបស់ខ្លួនឯណោះទៅវិញទេ។ ពួកគេដាក់ខ្លួនជាមិត្តរួមការងារឬជាសមាជិករួមក្រុមជាមួយនឹងកូនចៅដទៃៗទៀតរបស់ពួកគេ និងខិតខំស្វះស្វែងជួយនូវអ្វីដែលក្នុងនាមខ្លួនជាមេដឹកនាំអាចជួយកូនចៅបាន ដោយមិនខ្លាចប្រឡាក់ដៃឬគិតតែប្រយោជន៍ខ្លួននោះឡើយ។ លទ្ធផលចុងក្រោយដែលអ្នកដឹកនាំទាំងនេះទទួលបានពីកូនចៅគឺជាការគោរពដោយចេញពីចិត្ត ពុំមែនចេញពីការភ័យខ្លាចដោយសារតែអំណាចនៃមុខតំណែងរបស់ខ្លួននោះឡើយ។
២) មើលឃើញនូវគុណតម្លៃល្អៗរបស់កូនចៅ៖ ចំណុចខ្លាំងរបស់ម្នាក់នេះអាចជាចំណុចខ្សោយរបស់ម្នាក់ទៀត ប៉ុន្តែគ្រប់មនុស្សម្នាក់ៗសុទ្ធតែមានចំណុចពិសេសរៀងៗខ្លួន។ អ្នកដឹកនាំល្អនឹងអាចកត់សម្គាល់បាននូវចំណុចល្អៗទាំងនេះដែលមាននៅក្នុងគ្រប់កូនចៅរបស់ពួកគេម្នាក់ៗ។ ពួកគេខិតខំសិក្សាស្វែងយល់ថាតើអ្វីទៅដែលធ្វើឲ្យបុគ្គលិកម្នាក់ៗមានកម្លាំងចិត្ត និងប្រឹងប្រែងតស៊ូនឹងបញ្ហាលំបាកទាំងឡាយ ហើយកសាងទំនាក់ទំនងល្អៗជាមួយពួកគេ។
៣) មានភាពចាស់ទុំ៖ មនុស្សដែលអាចគ្រប់គ្រងអារម្មណ៍របស់ខ្លួនឯងបាន ចាត់ទុកថាជាមនុស្សដែលអាចយកឈ្នះរាល់បញ្ហាទាំងឡាយបានប្រកបដោយប្រាជ្ញាឈ្លាសវៃ។ អ្នកដឹកនាំល្អនឹងមិនប្រើប្រាស់អារម្មណ៍ពុះកញ្ជ្រោលមួយពេលរបស់ខ្លួនមកដោះស្រាយបញ្ហានោះឡើយ៕
ដោយ៖ ស្រីពៅ
