ក្រោយព្រឹត្តិការណ៍សម្ពោធស្មាតហ្វូនកំពូលប្រើកញ្ចក់កាមេរ៉ាសេរ៉ាមិក P20 និង P30 Pro រួចមក ក្រុមហ៊ុន Huawei ថែមទាំងបានប្រកាសស្មាតហ្វូនតម្លៃធូរថ្លៃមួយទៀតហើយ ដែលមានសមាមាត្រអេក្រង់ 18:9 អមដោយកាមេរ៉ាភ្លោះ។ ស្មាតហ្វូនថ្មីនេះមានឈ្មោះថា Huawei Y7 Prime 2018 ភ្ជាប់មកជាមួយអេក្រង់ ៦អ៊ីញ ប្រភេទ FullVision កម្រិត resolution នៅ 720x1440px ។ Y7 មានកាមេរ៉ាក្រោយភ្លោះ ដែលកាមេរ៉ាទី២ មានទំហំ 2MP សម្រាប់ជំនួយការថតទម្រង់ Portrait Mode ។
កាមេរ៉ាចម្បងរបស់ Y7 Prime 2018 មានទំហំ 12MP ដែលមានសមត្ថភាពប្រហាក់ប្រហែលនឹងកាមេរ៉ាមាននៅលើស្មាតហ្វូនធុនមធ្យមតម្លៃធូរត្រកូល Honor បច្ចុប្បន្ន។ កាមេរ៉ា 8MP មួយគ្រាប់ភ្ជាប់នៅខាងមុខ ល្មមអាចប្រើសម្រាប់ថតរូប selfie ជាមួយគុណភាពទទួលយកបាន។
ស្មាតហ្វូនស៊េរីថ្មី Y7 Prime 2018 ប្រើបន្ទះឈីប Snapdragon 430 អមដោយ RAM 3GB និងអង្គចងចាំ 32GB និងមានកម្លាំងថ្ម 3000mAh ទាបជាង Y7 ស៊េរីចាស់ឆ្នាំមុនដែលមានដល់ 4000mAh ។ ដំណឹងល្អគឺនៅត្រង់ Y1 Prime ឆ្នាំនេះ ដំណើរការដោយប្រព័ន្ធសូហ្វ៊ែរចុងក្រោយ Android 8.0 Oreo ជាមួយផ្ទៃ EMUI 8.0 ចេញពីប្រអប់។
Huawei មិនទាន់ប្រកាសអំពីតម្លៃផ្លូវការសម្រាប់ Y7 Prime 2018 នេះនៅឡើយ ប៉ុន្តែត្រូវសាធារណជនរំពឹងថា អាចស្ថិតក្រោម ២៥០ដុល្លារចុះក្រោម៕
ដោយ៖ រឹទ្ធិរាជ
ប្រភព៖ phonearena
