តើការចំណាយអ្វីខ្លះ ដែលអ្នកមិនគួររារែកសម្រាប់ដំណើរការអាជីវកម្មរបស់អ្នកក្នុងដំណាក់កាលដំបូង?
ចង់ដំណើរការអាជីវកម្មមួយឲ្យដើរទៅមុខបាន ម្ចាស់អាជីវកម្មនោះប្រាកដជាដឹងហើយថាមានចំណុចចម្បងៗជាច្រើនដែលតម្រូវឲ្យពួកគេធ្វើការចំណាយទៅលើ។ ប៉ុន្តែ ខ្វះខាតដើមទុនតែងតែជាបញ្ហាប្រឈមនៅក្នុងរាល់អាជីវកម្មទាំងឡាយ។ ដូច្នេះហើយនៅពេលដំណើរការដំបូង អ្នកប្រាកដជាត្រូវជ្រើសរើសថាតើអ្វីខ្លះដែលគួរចំណាយនិងអ្វីខ្លះដែលគួរតែទុកចោលមួយឡែកសិន។
ទោះជាយ៉ាងណាក៏ដោយ ៣ចំណុចខាងក្រោមនេះគឺជាចំណុចសំខាន់ៗនៅក្នុងអាជីវកម្មដែលអ្នកមិនគួររំលងការចំណាយទៅលើវានោះឡើយ៖
១) ផលិតផលរបស់អ្នក៖ ផលិតផលរបស់អ្នកគឺជាផ្នែកដ៏សំខាន់មួយដែលនឹងកំណត់ទៅលើជោគវាសនារបស់អាជីវកម្មអ្នក ដែលហេតុនេះហើយទើបអ្នកចាំបាច់ត្រូវយកចិត្តទុកដាក់ទៅលើការសម្រេចចិត្តនានាចំពោះផលិតផលរបស់អ្នក ជាពិសេសគឺការសម្រេចចិត្តចំពោះការចំណាយប្រាក់ទៅលើវានេះឯង។ បើសិនជាអ្នកគិតថាការចំណាយណាមួយនោះនឹងធ្វើឲ្យផលិតផលរបស់អ្នកមានគុណភាពនិងភាពទាក់ទាញ នោះអ្នកមិនគួររារែកនឹងក្នុងការចំណាយនោះឡើយ។
២) ការធ្វើតេស្តសាកល្បងចំពោះផលិតផលរបស់អ្នក៖ នៅក្នុងដំណាក់កាលនៃការធ្វើតេស្តសាកល្បងផលិតផលរបស់អ្នកនេះ គឺពិតជាមានសារសំខាន់ណាស់ ព្រោះវាអាចផ្ដល់នូវមតិយោបល់ល្អៗជាច្រើនដែលនឹងជួយកែលំអដល់ផលិតផលរបស់អ្នកឲ្យឆ្ពោះទៅរកភាពល្អប្រសើរសម្រាប់អ្នកប្រើប្រាស់។ ហេតុនេះ វាក៏ជាការចំណាយដ៏សំខាន់មួយទៀតដែរ ដែលអ្នកមិនគួររារែកសម្រាប់ចាយវាយទៅលើវា។
៣) គេហទំព័រវេបសាយរបស់អ្នក៖ នៅក្នុងសម័យបច្ចេកវិទ្យាជឿនលឿនដូចពេលឥឡូវនេះ អ្នកអាចទាញយកប្រយោជន៍ជាច្រើនពីវាសម្រាប់មកប្រើប្រាស់នៅក្នុងអាជីវកម្មរបស់អ្នក។ ការមានគេហទំព័រវេបសាយផ្លូវការមួយសម្រាប់អាជីវកម្មរបស់អ្នក នឹងផ្ដល់ភាពងាយស្រួលដល់អតិថិជនទាំងឡាយដែលមានបំណងចង់ជាវផលិតផលឬសេវាកម្មរបស់អ្នកយកទៅប្រើប្រាស់។ ម្យ៉ាងទៀត បច្ចុប្បន្ននេះក៏មានមនុស្សជាច្រើនដែរដែលមានឧបករណ៍អេឡិចត្រូនិកដូចជាកុំព្យូទ័រនិងទូរស័ព្ទស្មាតហ្វូន ដែលអាចឲ្យពួកគេរកអ្នកបាននៅលើគេហទំព័រវេបសាយដោយងាយស្រួលបាន៕
ប្រភព៖ lifehack.com ប្រែសម្រួល៖ ស្រីពៅ