រោងចក្រផ្គុំ និងដំឡើងរថយន្ត នឹងលេចវត្តមាននៅ សង្កាត់អូរបែកក្អម
យោងតាមសេចក្ដីប្រកាសរបស់ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា CDC បានចេញផ្សាយនៅលើទំព័រ Facebook របស់ខ្លួនកាលពីថ្ងៃទី ២៧ ខែមីនា ឆ្នាំ២០១៨ ថា គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ វិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន International VCV Industry Co., Ltd ដើម្បីបង្កើតរោងចក្រផ្គុំ និងដំឡើងរថយន្ត។
រោងចក្រនេះ មានទីតាំងស្ថិតនៅភូមិទ្រុងមាន់ សង្កាត់អូរបែកក្អម (អតីតភូមិទឹកថ្លា សង្កាត់ទឹកថ្លា) ខណ្ឌសែនសុខ រាជធានីភ្នំពេញ។ បើតាមការឱ្យដឹងពីប្រភពដដែល គឺថា ក្រុមហ៊ុនខាងលើ មានទុនវិនិយោគប្រមាណជា ៤,០៧ លានដុល្លារអាមេរិក និងអាចបង្កើតការងារសម្រាប់ពលរដ្ឋកម្ពុជា បានជាង ៨២០ កន្លែង។
