កូរ៉េខាងត្បូងចេញច្បាប់ឲ្យប្រជាជនបិទកុំព្យូទ័រដើម្បីកុំឱ្យធ្វើការថែមម៉ោងច្រើនពេក
គេហទំព័រវេទិកាសេដ្ឋកិច្ចសកល ដែលហៅជាភាសាអង់គ្លេសថា World Economic Forum កាលពីថ្មីៗនេះបានឱ្យដឹងថា ប្រទេសកូរ៉េខាងត្បូង បានសម្រេចចិត្តចេញច្បាប់មួយដែលបង្ខំឲ្យមនុស្សឱ្យបិទកុំព្យូទ័រដើម្បីកុំឱ្យថែមម៉ោងការងារច្រើនពេក។
មូលហេតុចម្បងដែលធ្វើឲ្យប្រទេសកូរ៉េខាងត្បូង ចេញច្បាប់មួយនេះគឺដោយសារតែប្រជាជនកូរ៉េខាងត្បូង ភាគច្រើនចូលចិត្តធ្វើការថែមម៉ោង មិនព្រមចេញពីការិយាល័យនោះទេ។ ក្នុងមួយសប្ដាហ៍ ប្រជាជនកូរ៉េ ធ្វើការរហូតដល់ទៅ ៦៨ម៉ោង ដែលនេះជាតួលេខដ៏ខ្ពស់បំផុត។ ដូច្នេះហើយ ប្រទេសកូរ៉េសម្រេចចិត្តចេញច្បាប់មួយនេះដើម្បីបញ្ចប់វប្បធម៌ធ្វើការថែមម៉ោងនិងជំរុញឲ្យមនុស្សមានតុល្យភាពរវាង ការងារនិងជីវិតផ្ទាល់ខ្លួន។
ចាប់ពីពេលនេះតទៅ រាល់ម៉ោង៨ យប់ឡើងទៅ ប្រព័ន្ធកុំព្យូទ័រនឹងត្រូវបានបញ្ឈប់ដោយស្វ័យប្រវត្តិ។ ឥឡូវនេះ ប្រជាជនកូរ៉េធ្វើការត្រឹម ៤៨ម៉ោងក្នុងមួយសប្ដាហ៍ដូចប្រទេសគេផ្សេងតែប៉ុណ្ណោះ៕
ដោយ៖ អឹុង មុយយូ
