វិធីសាស្ត្រងាយៗ៣យ៉ាង ដែលអ្នកអាចប្រើសម្រាប់សម្អាតស្នាមប្រឡាក់នៅលើសម្ភារប្រើប្រាស់ក្នុងផ្ទះបាន
តើអ្នកចង់ដឹងពីវិធីងាយៗដែលអ្នកអាចកម្ចាត់ស្នាមប្រឡាក់ផ្សេងៗដែលមាននៅលើសម្ភារប្រើប្រាស់ក្នុងផ្ទះដោយមិនចាំបាច់អស់ប្រាក់ច្រើន និងទទួលបានប្រសិទ្ធភាពទេ ? ខាងក្រោមនេះគឺជាវិធី៣យ៉ាងដែលអ្នកអាចសាកល្បងយកទៅពិសោធន៍ដោយខ្លួនឯងបាន៖
១) លាយទឹកជាមួយទឹកខ្មេះ៖ ទឹកខ្មេះមានអត្ថប្រយោជន៍ច្រើនបែបច្រើនយ៉ាង ដែលក្នុងនោះក៏មានផងដែរនូវប្រយោជន៍សម្រាប់ប្រើប្រាស់ជាទឹកលាងសម្អាតកម្ទេចធូលីនៅលើផ្ទាំងកញ្ចក់ឬបង្អួចផ្សេងៗនៅក្នុងផ្ទះសម្បែងឬកន្លែងធ្វើការរបស់អ្នកបាន។ អ្នកគ្រាន់តែលាយទឹកខ្មេះបន្តិចចូលទៅក្នុងទឹកសដែលបានដាក់បញ្ចូលនៅក្នុងដបបាញ់មួយ បន្ទាប់មកអ្នកអាចប្រើប្រាស់វាប្រចាំថ្ងៃសម្រាប់លាងសម្អាតបានដោយអស់ប្រាក់តិចតួចបំផុត មិនបំពុលបរិស្ថាន និងមានប្រសិទ្ធភាពទៀតផង។
២) ប្រើអំបិលសម្រាប់កម្ចាត់ស្នាមពណ៌ប្រឡាក់៖ បើអ្នកធ្វើឲ្យកំពប់ទឹកពណ៌ផ្សេងៗដែលបានប្រឡាក់ដល់ក្រណាត់របស់អ្នក នោះអ្នកមិនបាច់ព្រួយបារម្ភឡើយ ព្រោះភ្នាក់ងារកម្ចាត់ស្នាមប្រឡាក់ដ៏សាមញ្ញបំផុតដែលអាចរកបាននៅក្នុងផ្ទះបាយរបស់អ្នកនោះគឺអំបិលនេះឯង។ ដោយគ្រាន់តែចាក់អំបិលនៅពីលើតំបន់ដែលបានប្រឡាក់ស្នាមពណ៌ភ្លាមៗបន្ទាប់ពីស្នាមប្រឡាក់បានជ្រាបដល់ក្រណាត់ នោះអំបិលនឹងបឺតស្រូបយកស្នាមប្រឡាក់របស់ពណ៌នោះជាមិនខាន។
៣) សម្អាតក្រណាត់ស្បែក៖ បើសិនជាអ្នកចង់សម្អាតសាឡុងដែលធ្វើពីក្រណាត់ស្បែក នោះអ្នកគ្រាន់តែយកក្រណាត់មកជ្រលក់ទឹកសាប៊ូហើយជូតសម្អាតវាគឺជាការស្រេចហើយ។ ប៉ុន្តែបើមានស្នាមប្រឡាក់ពណ៌ដែលមិនអាចសម្អាតឲ្យជ្រះដោយងាយៗបាន នោះអ្នកអាចត្រដុសតំបន់ដែលប្រឡាក់នោះឲ្យខ្លាំងជាងមុន ហើយប្រើសំឡីជ្រលក់ជាមួយអ៊ីដ្រូហ្សែនពែអុកស៊ីតឬហៅម្យ៉ាងទៀតថាទឹកអុកស៊ីហ្សែន ដើម្បីសម្អាតស្នាមនោះឲ្យបាត់បាន៕
ប្រភព៖ quickanddirtytips.com
ប្រែសម្រួល៖ ស្រីពៅ
