ធនាគារពិភពលោកអះអាងថា បរិយាកាសអាជីវកម្មកម្ពុជាមានការប្រសើរឡើងគឺជាប់លេខ ១២៧
ធនាគារពិភពលោកបានអះអាងកាលពីថ្ងៃពុធម្សិលមិញនេះថា ប្រទេសកម្ពុជាបានបន្តកែលម្អបរិយាកាសអាជីវកម្ម (business environment) ក្នុងរយៈពេលប៉ុន្មានឆ្នាំចុងក្រោយនេះ។ នេះបើតាមការចុះផ្សាយសារព័ត៌មានរដ្ឋចិន Xinhua។
នៅក្នុងរបាយការណ៍របស់ខ្លួនដែលមានឈ្មោះថា "Doing Business 2016” ដែលទើបនឹងចេញផ្សាយ បានឱ្យដឹងថា ក្នុងចំណោមប្រទេស ១៨៩ កម្ពុជាឈរនៅលេខរៀងទី ១២៧នៅឆ្នាំ ២០១៥ នេះ ខណៈកាលពីឆ្នាំ ២០១៤ នៅឈរលេខរៀងទី១៣៣។ របាយការណ៍ដដែលក៏បានឱ្យដឹងបន្ថែមទៀតថា នៅពេលអនាគតប្រទេសនៅតំបន់អាស៊ីអាគ្នេយ៍នឹងមានឱកាសកែលម្អបរិយាកាសអាជីវកម្មបន្ថែមទៀត។ និយាយដោយឡែក គឺប្រទេសទាំងអស់នេះគ្រាន់តែលុបចោលការតម្រូវទុនអប្បបរមាដើម្បីបើកអាជីវកម្មថ្មីមួយជាការស្រេច។ សូមបញ្ជាក់ថា តាមរបាយការណ៍ដដែល គឺប្រទេសសិង្ហបុរីនៅឈរលេខមួយនៅក្នុងលោកដែលមានបរិយាកាសអាជីវកម្មល្អប្រសើរបំផុតនៅឈរពីក្រោយដោយប្រទេសនូវែលហ្សេឡង់ ដាណឺម៉ាក កូរ៉េខាងត្បូង និងចិនហុងកុង៕
