ការងារជាអ្នកគ្រប់គ្រងធនធានមនុស្ស (HR) មិនមែនជារឿងងាយស្រួលនោះទេ ជួនកាលត្រូវប្រឈមនឹងបញ្ហាជាច្រើនដូចជា បញ្ហាជាមួយថៅកែ និងការមិនពេញចិត្តពីបុគ្គលិកជាដើម។ នេះជាការលើកឡើងរបស់ អ្នកស្រី ឡេង សុម៉ាលី នាយិកាប្រតិបត្តិ​របស់ក្រុមហ៊ុន ប្រូវិតាអ៊ីនសូរេន ក្នុងកម្មវិធីវេទិកាអ្នកគ្រប់គ្រងធនធានមនុស្សកម្ពុជា ដែលបានធ្វើឡើងនៅថ្ងៃទី១៦ មីនា ២០១៨ នៅសណ្ឋាគារភ្នំពេញ។ អ្នកស្រីលើកឡើងថា ដើម្បីធ្វើជា ក​គ្រប់គ្រង​ធនធាន​មនុស្ស​ (HR) ដ៏ល្អម្នាក់ អ្នកគ្រប់គ្រងធនធានមនុស្សគួរធ្វើរឿង ៣យ៉ាងនេះគឺ៖ ១. ធ្វើជាដៃគូយុទ្ធសាស្ត្ររបស់ក្រុមហ៊ុន ​អ្នក​គ្រប់គ្រង​ធនធាន​មនុស្ស​ (HR) ត្រូវតែជាអ្នកគ្រប់គ្រង និង ថែទាំសមត្ថភាពរបស់ក្រុមហ៊ុនដែលសម្ដៅដល់ការជ្រើសរើសបុគ្គលិកដែលមានសមត្ថភាពពិតប្រាកដឲ្យចូលមកធ្វើការ លើសពីនេះគេត្រូវមានបទពិសោធន៍អាជីវកម្ម ចេះផ្តល់តម្លៃរវាងបុគ្គលិក អ្នកគ្រប់គ្រង និងធ្វើយ៉ាងណាឲ្យមានកំណើនវិនិយោគទុន និងអតិថិជន ដល់ក្រុមហ៊ុន។ ២. ធ្វើជាអ្នក​ជ្រោមជ្រែង​របស់បុគ្គលិក អ្នក​គ្រប់គ្រង​ធនធាន​មនុស្ស​ (HR) អាចជួយបុគ្គលិកតាមរយៈការបង្កើតបរិយាកាសការងារមួយដែលល្អសម្រាប់ពួកគេ និងការលើកទឹកចិត្តឬផ្ដល់តម្លៃដល់អ្នកមានសមត្ថភាពជាដើម។ អ្នកស្រីបន្ថែមថា អ្នក​គ្រប់គ្រង​ធនធាន​មនុស្ស​ (HR)  ល្អគឺចេះធ្វើឲ្យបុគ្គលិកចាត់ទុកការងារក្រុមហ៊ុនថាជាការងាររបស់ខ្លួន។ ៣. ធ្វើជាអ្នកដឹកនាំក្នុងការផ្លាស់ប្តូរ ចំណុចនេះអ្នកស្រីចង់មានន័យថា ក្រុមហ៊ុនមួយមិនអាចនៅដដែលបានទេ គឺត្រូវមានការអភិវឌ្ឍ ឬផ្លាស់ប្តូរ ដូច្នេះ​អ្នក​គ្រប់គ្រង​ធនធាន​មនុស្ស​ (HR) ​ត្រូវ​មាន​ទួល​នាទី​​ចេះផ្លាស់ប្តូរទម្លាប់ ឬឥរិយាបថមួយចំនួនរបស់បុគ្គលិកដើម្បីឲ្យទាន់សភាពការជាក់ស្តែង៕ អត្ថបទ៖ វាសនា និង​ស្រីរ័ត្ន