ចំណុចទាំង៤នេះ បញ្ជាក់ថា លោកអ្នកគួរធ្វើជំនួញក្នុងវ័យខ្ទង់ ២០ឆ្នាំ
ភាពជោគជ័យក្នុងការបើកជំនួញ គឺជាសេចក្តីប្រាថ្នារបស់មនុស្សជាច្រើន ព្រោះថាវាជារឿងដ៏អស្ចារ្យមួយក្នុងជីវិតមនុស្សម្នាក់ៗ។ ជាការពិតណាស់ ការធ្វើជំនួញ មិនមែនជាការងាយនោះឡើយ ព្រោះថា ទម្រាំទទួលបានជោគជ័យនោះប្រាកដជា ត្រូវប្រឈមនឹងបញ្ហាជាច្រើន ឬ ពេលខ្លះត្រូវបរាជ័យច្រើនដងក៏ថាបាន។
ដោយសារតែបែបនេះហើយ បានជាមនុស្សវ័យក្មេងមួយចំនួន គិតថានឹងបើកជំនួញនៅពេលដែល ពួកគេមានវ័យចាស់បន្តិច ប៉ុន្តែភាពជោគជ័យ មិនអាចកំណត់ដោយអាយុតែម្យ៉ាងនោះទេ ពោលគឺមានកត្តារួមផ្សំជាមួយទៀត ដែលសហគ្រិនត្រូវមាន។ ដូច្នេះបើអ្នកចង់ បើកជំនួញ សូមកុំរារែកពោលគឺត្រូវតាំងចិត្តធ្វើវា បើទោះបីជាអ្នកស្ថិតក្នុងវ័យខ្ទង់ ២០ប្លាយក៏ដោយ។
ខាងក្រោមនេះ គឺជាហេតុផលដែលអ្នកគួរបើកជំនួញក្នុងវ័យ២០ឆ្នាំប្លាយ៖
១) កំពុងស្ថិតក្នុងវ័យស្រេកឃ្លានជ័យជំនះ
វ័យនេះ គឺជាវ័យមួយដែលមនុស្សគ្រប់គ្នាតែងចង់បង្ហាញទៅកាន់អ្នកដទៃថា ជាខ្លួនមនុស្សអស្ចារ្យ។ ដូច្នេះហើយ ប្រសិនបើអ្នកចង់រកស៊ីមែន សូមកុំរារែកចិត្តអី ហើយគួរតែព្យាយាមរកវិធីសាស្ត្រយ៉ាងណាដើម្បីអាចធ្វើឲ្យក្តីសុបិន្ដក្លាយជាការពិតបាន។
២) មានពេលគ្រប់គ្រាន់
ថ្វីត្បិតតែ ស្ថិតក្នុងវ័យខ្ទង់២០ឆ្នាំ គឺមិនសូវមានបទពិសោធន៍មែន ប៉ុន្តែវាជាវ័យដ៏សំខាន់មួយ ក្នុងការរៀនសូត្រ ហើយបើទោះបីជាអ្នកត្រូវបរាជ័យក៏ដោយ ប៉ុន្តែអ្នកនៅមានពេលវេលាវែងឆ្ងាយទៅទៀត។ ចំពោះអ្នកដែលគិតថា ចាំដល់វ័យច្រើនសឹមបើកជំនួញនោះ គឺអាចនឹងមិនមានកម្លាំង និង ពេលវេលាគ្រប់គ្រាន់នោះឡើយ ជាពិសេសនៅពេលជួបការបរាជ័យច្រើនដង។
៣) មិនសូវមានបញ្ហាគ្រួសារស្មុគស្មាញ
មនុស្សដែលស្ថិតក្នុងវ័យនេះ គឺមានភាគរយមិនមានគ្រួសារច្រើនគួរសម។ ភាពនៅទំនេរមិនទាន់មានគ្រួសារនេះ ក៏ជាផ្នែកល្អមួយក្នុងការបើកជំនួញផងដែរ ព្រោះអ្នកមិនចាំបាច់ខ្វល់ខ្វាយ ពីរឿងនៅផ្ទះច្រើនដូចអ្នកមានគ្រួសារនោះឡើយ។ ប្រការនេះ អាចជួយឲ្យអ្នកអាច មានការផ្ដោតអារម្មណ៍ និង តាំងចិត្តធ្វើការបានល្អ ដើម្បីសម្រេចគោលដៅ។
៤) ស្គាល់បច្ចេកវិទ្យា និង មានបណ្ដាញច្រើន
ចំពោះអ្នកដែល ស្ថិតក្នុងវ័យនេះ ភាគច្រើនគឺស្គាល់បច្ចេកវិទ្យាថ្មីៗជាច្រើន ដែលអាចបម្រើដល់ ប្រយោជន៍នៃការធ្វើជំនួញ។ ហើយម្យ៉ាងវិញទៀត ក៏មានមិត្តភក្ដិ និង បណ្ដាញជាច្រើនផងដែរ។ ការមានបណ្ដាញច្រើនបែបនេះ វាអាចជួយឲ្យអាជីវកម្មរបស់អ្នកអាចឆាប់ដំណើរការទៅបានរហ័ស តាមរយៈការណែនាំទៅកាន់អ្នកទាំងនោះ ហើយពេលខ្លះក៏អាចទទួលបានដំបូន្មានល្អៗផងដែរ៕
ដោយ៖ អ៊ុន ភក្តី ប្រភព៖ addicted2success.com, www.businessinsider.com & yfsmagazine.com
