ក្រុមហ៊ុន BlackBerry ជាក់ស្ដែងណាស់កំពុងប្ដឹងក្រុមហ៊ុន Facebook លើករណីរំលោភប៉ាតង់។ ក្នុងជម្លោះប៉ាតង់នេះ ក្រុមហ៊ុនកាណាដាបានចោទថា Facebook បានរំលោភលើកម្មសិទ្ធិបញ្ញា ទាក់ទិននឹងកម្មវិធីផ្ញើសារ (messaging patents) ដែល BlackBerry ជាម្ចាស់។
BlackBerry កំពុងចង់ចេញសេចក្ដីបង្គាប់ឱ្យបិទ Facebook, Facebook Messenger, WhatsAp និង Instagram។ ក្រុមហ៊ុនទូរស័ព្ទកាណាដានេះ ហាក់ចង់លើកឡើងថា Facebook កំពុងរំលោភលើប៉ាតង់កម្មវិធីផ្ញើសារខុសគ្នាចំនួន៧ ។
ពេលនេះ BlackBerry កំពុងស្វែងរកការដោះស្រាយមួយចំនួនពីភាគី Facebook ដូចសេចក្ដីរៀបរាប់ខាងក្រោម៖ “ក្នុងនាមក្រុមហ៊ុនឈានមុន ខាងផ្នែក cybersecurity និង embedded software គំនិតរបស់ BlackBerry គឺថា Facebook, Instagram និង WhatsApp អាចក្លាយជាដៃគូដ៏អស្ចារ្យនៅក្នុងការជំរុញឆ្ពោះទៅអនាគតពោរពេញដោយការភ្ជាប់ទំនាក់ទំនងមានសុវត្ថិភាពដល់អ្នកប្រើ ហើយយើងបន្តបើកចំហឱ្យពួកគេ។ ទោះជាយ៉ាងណា យើងអះអាងយ៉ាងមុតមាំថា Facebook បានរំលោភលើកម្មសិទ្ធិបញ្ញារបស់យើង ហើយបន្ទាប់ពីកិច្ចពិភាក្សាច្រើនឆ្នាំ យើងក៏មានកាតព្វកិច្ចចំពោះម្ចាស់ភាគហ៊ុនរបស់យើង ដើម្បីស្វែងរកដំណោះស្រាយស្របច្បាប់”។
Facebook ក៏បានចេញសេចក្ដីថ្លែងការណ៍របស់ខ្លួនផងដែរ៖ “ជាការឆ្លុះបញ្ចាំងពីស្ថានភាពគួរអាសូររបស់ BlackBerry នៅក្នុងជំនួញកម្មវិធីផ្ញើសារ (messaging business)។ ដោយការលះបង់កិច្ចខិតខំប្រឹងប្រែងរបស់ខ្លួនក្នុងការច្នៃប្រឌិត BlackBerry ពេលនេះកំពុងសម្លឹងមើលការច្នៃប្រឌិតរបស់អ្នកដទៃ។ យើងនឹងប្រឆាំងតទល់គ្នា”។ នេះបើតាមការលើកឡើងរបស់លោក Paul Greal អ្នកទទួលបន្ទុកផ្លូវច្បាប់របស់ Facebook ៕
ដោយ៖ រឹទ្ធិរាជ
ប្រភព៖ Variety
