បណ្ដាញសង្គម Facebook ពេលនេះបានបញ្ចប់ការធ្វើតេស្តលើ ៦ប្រទេសក្នុងការបំបែក news feed ជាពីរដាច់ពីគ្នារវាង News Feed របស់ friend និង News Feed របស់ Page នៅលើ Explore Feed វិញ។ នាយកប្រតិបត្តិក្រុមហ៊ុន Facebook លោក Mark Zukerberg ថ្មីៗនេះបានធ្វើបំឡាស់ប្ដូរដ៏ធំនៅលើ News Feed ។ News Feed របស់អ្នកនឹងមិនត្រូវបំបែករវាង News Feed របស់ Friend និង News Feed របស់ Page ទៀតទេ។ កាលពីខែតុលា ក្រុមហ៊ុន Facebook បានចាប់ផ្ដើមធ្វើតេស្ត ផ្លាស់ប្ដូរទម្រង់បង្ហាញ Feed ដោយការបំបែកចេញជាពីរ មួយគឺជា មាតិកាបង្ហោះចេញពី Friend ឬ Family និងមួយទៀតហៅថា “Explore Feed” សម្រាប់បណ្ដា Page ដែលជាប្រភេទ brands, publishers និងទំព័រអាជីវកម្មផ្សេងៗ។
កាលពីថ្ងៃព្រហស្បតិ៍ ក្រុមហ៊ុនបណ្ដាញសង្គមដ៏ល្បីនេះ បានបញ្ជាក់ឱ្យដឹងជាសាធារណៈថា ខ្លួននឹងបញ្ចប់ការធ្វើតេស្ត ពីព្រោះលទ្ធផលទទួលបានហើយ ដែលជាភាពអវិជ្ជមានច្រើនជាង។ លទ្ធផលបង្ហាញថា អ្នកប្រើប្រាស់មិនចង់បានការបំបែក Feeds ជាពីរផ្សេងគ្នាទេ។ នេះបើតាមការឱ្យដឹងពី លោក Adam Mosseri ប្រធានផ្នែក News Feed របស់ Facebook សរសេរនៅលើប្លុកមួយ។ លទ្ធផលស្ទង់មតិ បានបង្ហាញថា ពួកគេមិនសូវជាពេញចិត្តចំពោះទម្រង់នៃការមើលផុស (Post) ដែលបែងចែកជាពីរអំឡុងពេលធ្វើតេស្តទេ ហើយ Feeds ដាច់ពីគ្នាបែបនេះ ហាក់មិនជួយសម្រួលដល់ការភ្ជាប់ទំនាក់ទំនងបានច្រើនជាមួយមិត្តភ័ក្ដិ (friends) និងក្រុមគ្រួសារ (family) អ្វីនោះទេ។
ក្រុមហ៊ុនបានធ្វើការផ្លាស់ប្ដូរដ៏ធំនៅលើ News Feed កាលពីប៉ុន្មានខែមុន។ លោក Mark Zuckerberg ពេលនេះមានបេសកកម្មមួយ ដើម្បីបញ្ជាក់ថា Facebook គឺមានសារប្រយោជន៍ សម្រាប់ពិភពលោក និងសម្រាប់មនុស្សជាតិក្រៃលែង។ គាត់បានលើកឡើងថា News Feed នឹងជំរុញការផ្ដោតឃើញមាតិកាដែលបង្ហោះដោយមិត្តភ័ក្ដិ និងក្រុមគ្រួសារ ដែលមានជាវីដេអូ និងដំណឹងព័ត៌មានផ្សេងៗ ។ លោក Mosseri បានលើកឡើងថា ការផ្លាស់ប្ដូរថ្មីៗ នឹងត្រូវចំតម្រូវការរបស់អ្នកប្រើ ល្អជាងទម្រង់សាកល្បង Explore Feed។
សូមបញ្ជាក់ថា ទម្រង់ Explore Feed ត្រូវបានប្រកាសដាក់ឱ្យធ្វើតេស្តដំបូងតាំងពីខែតុលា ឆ្នាំ២០១៧ ទៅលើប្រទេសមួយចំនួនដូចជា៖ ស្លូវ៉ាគី, ស្រីលង្កា, ស៊ែប៊ី, បូលីវី, ហ្គាតេម៉ាឡា និង កម្ពុជា។ អំឡុងពេលដាក់ឱ្យដំណើរការសាកល្បងនូវ Explore Feed នេះបានធ្វើឱ្យប៉ះពាល់ដល់ចំនួនមើលឃើញ organic reach នៃ fan pages ដោយធ្លាក់ចុះយ៉ាងគំហុកមិនធ្លាប់មាន៕
ដោយ ៖ រឹទ្ធិរាជ
ប្រភព៖ cnet
