ZenFone 5 និង 5Z ត្រូវបានគេដាក់រហ័ស iPhone X clone មួយទៀតហើយ ក្រោយវត្តមានស្មាតហ្វូនចិន
Doogee V ។ រចនាបថឌីហ្សាញផ្ទៃខាងមុខរបស់ស្មាតហ្វូន Asus ថ្មីនេះ គឺស្ទើរតែដូចបេះបិទទៅនឹង iPhone X របស់ Apple អីចឹង ជាក់ស្ដែងក៏បានរចនាបែបឆកនៅអេក្រង់ខាងលើផងដែរ គ្រាន់តែសាច់គែមទូរស័ព្ទសល់ក្រាស់ជាងបន្តិចផ្នែកក្រោម ចំណែកទម្រង់កាមេរ៉ាភ្លោះគឺឌីហ្សាញបញ្ឈរដូចគ្នា។
ក្រុមហ៊ុន Asus បានបើកសម្ពោធស្មាតហ្វូនត្រកូល ZenFone ថ្មីទាំងពីរម៉ូដែល ZenFone 5 និង ZenFone 5Z នេះនៅក្នុងព្រឹត្តិការណ៍ MWC ថ្មីៗនេះ។ ZenFone 5Z ជាស្មាតហ្វូនទំនើបកំពូល ដែលភ្ជាប់លក្ខណៈសម្បត្តិខ្ពស់ៗ គឺខ្ពស់ជាង ZenFone 5 តែទាំងពីរម៉ូដែលសុទ្ធតែឌីហ្សាញមានគែមផលិតពីលោហធាតុ និងក្រាលដោយកញ្ចក់ប្រភេទ 2.5D ទាំងផ្ទៃមុខ និងខាងក្រោយដូចគ្នា។ កាន់តែពិសេស ប្រព័ន្ធកាមេរ៉ានៅលើស្មាតហ្វូនទាំងពីរ សុទ្ធតែបានបញ្ចូលបច្ចេកវិទ្យា AI Boost (ដែលមានតម្រូវការសម្រាប់ Gaming), AI Photography (ដែលនឹងចាប់ប្លង់ scene detection, photo learning, portrait mode និងមុខងារ beautification), AI Display (គឺរក្សាអេក្រង់ឱ្យបើកជាប់ ពេលអ្នកសម្លឹងអេក្រង់ជាប់ ហើយធ្វើការកំណត់ពណ៌ដោយស្វ័យប្រវត្តិអាស្រ័យស្ថានភាពខុសៗគ្នា) និងសូម្បីតែមុខងារ AI Ringtone (ដែលធ្វើការកំណត់សំឡេងស្វ័យប្រវត្តិ ផ្អែកទៅតាមបរិយាកាសអ៊ូអរ ឬស្ងាត់)។
Asus ថែមទាំងបានណែនាំមុខងារថ្មីមួយឈ្មោះ ZeniMoji ដែលអាចបង្កើតប្រភេទរូបមានចលនា live-animated avatar ដែលអ្នកប្រើក្នុងការខលវីដេអូ ឬឡាយវ៍វីដេអូ (live stream) ក៏បាន។ ZenFone 5 មានអេក្រង់ ៦,២អ៊ីញកម្រិត 2246x1080px ប្រភេទ Super IPS touchscreen ជាមួយ DCI-P3 ជាមួយសមាមាត្រអេក្រង់ 19:9 aspect ratio, កម្រិតពន្លឺ 500-nitនិងមានសាច់អេក្រង់ដែលបាំង (notch) តូចជាង 26% ប្រៀបធៀប notch នៅលើ iPhone X ។ ពោលគឺថា ZenFone 5 លាតសន្ធឹងដោយសាច់អេក្រង់រហូតដល់ ៩០% គឺពិតជាស្លីមមែន។
Asus ZenFone 5 ប្រើឈី Snapdragon 636 របស់ Qualcomm ជាខ្នាត 14nm processor ហើយមានជម្រើស RAM ពី 4GB ទៅ 6GB និងមានអង្គចងចាំទំហំ 64GB ។ ងាកមកកាមេរ៉ាក្រោយរបស់វាវិញ មានទំហំ 12MP ជាមួយ IMX363 sensor របស់ Sony, កម្រិត f/1.8 aperture, OIS, dual pixel phase detection autofocus, 1.4um pixel និង 83-degree filed-of-view ។ ZenFone 5 មានកម្លាំងថ្ម 3300mAh អមជាមួយ AI Charging ដែលអាចកាន់ថ្មបានយូរជាងស្មាតហ្វូន Asus ជំនាន់មុនៗ។ វាជាស្មាតហ្វូនស៊ីម២ បំពាក់ speaker ប្រភេទ dual-speaker ជាមួយ dual amps ។
https://youtu.be/slqkNYdTznk
ងាកមកមើល ZenFone 5Z វិញគឺមានសមត្ថភាពខ្ពស់ជាង ZenFone 5 ដោយវាបំពាក់ឈីបដល់ Snapdragon 845 ហើយមាន RAM ដល់ 8GB និងអង្គចងចាំ 256GB ។ ស្មាតហ្វូននេះមានជម្រើសលក្ខណៈ សម្បត្តិចំនួន៣ គឺ 6GB/64GB, 8GB/128GB និង 8GB/256GB ។ Asus ZenFone 5Z នឹងមានលក់ប្រហែលតម្លៃ ៤៧៩អឺរ៉ូ ឬប្រហែល ៥៨៥ដុល្លារ ខណៈ Asus ZenFone 5 ធម្មតាមិនទាន់ត្រូវក្រុមហ៊ុនបញ្ជាក់ឱ្យដឹងនៅឡើយ៕
ដោយ៖ រឹទ្ធិរាជ
ប្រភព៖ gsmarena
