មហាសេដ្ឋីត្រឹមតែ ១% កាន់កាប់ទ្រព្យសម្បត្តិជាងពាក់កណ្ដាលប្រជាជនពិភពលោក
បើយោងតាមរបាយការណ៍របស់ Credit Suisse ក្រុមហ៊ុនផ្ដល់សេវាកម្មហិរញ្ញវត្ថុក្នុងប្រទេសស្វីស បានឲ្យដឹងថា ចំនួនទ្រព្យសម្បត្តិសរុបរបស់ពិភពលោកមានការកើនឡើងប្រមាណ ៦% ក្នុងរយៈពេល ១២ខែចុងក្រោយនេះ ដែលមានចំនួនរហូតដល់ទៅ ២៨០ លានលានដុល្លារ (ទ្រីលាន) ដែលចំនួននេះមានការកើនឡើងដ៏លឿនបំផុតចាប់តាំងពីឆ្នាំ ២០១២ មក។
ទំហំទ្រព្យសម្បត្តិជាងពាក់កណ្ដាលនៃ ១៦.៧ លានលានដុល្លារ គឺស្ថិតនៅក្នុងទឹកដី សហរដ្ឋអាមេរិក ដែលមានការកើនឡើង ៨.៥ លានលានដុល្លារ។ មួយភាគរយនៃកំពូលមហាសេដ្ឋី កាន់កាប់ទ្រព្យសម្បត្តិសរុប រហូតដល់ ៥០.១ % នៃទ្រព្យសម្បត្តិសរុបក្នុងលោក ដែលចំនួននេះមានការកើនឡើងពី ៤៥.៥% ក្នុងឆ្នាំ ២០០១។
បច្ចុប្បន្នមានមហាសេដ្ឋីប្រហែល ៣៦លាននាក់ ក្នុងពិភពលោក ហើយនឹងត្រូវគេប៉ានប្រមាណថានឹងកើនឡើងរហូតដល់ ៤៤ លាននាក់ ត្រឹមឆ្នាំ ២០២២។ សហរដ្ឋអាមេរិកគឺជាប្រទេសជាប់ចំណាត់ថ្នាក់លេខ១ ដែលមានសេដ្ឋីច្រើនជាងគេរហូតដល់ ១៥.៣ លាននាក់។ ប្រទេសជប៉ុនជាប់លំដាប់លេខ ២ មានមហាសេដ្ឋី ២.៧ លាននាក់ ខណៈប្រទេសអង់គ្លេស ជាប់ចំណាត់ថ្នាក់លេខ ៣ មាន ២.២ លាននាក់។
ប្រទេសចិនជាប់ចំណាត់ថ្នាក់លេខ ៤ មាន ១.៩ លាននាក់ តែប្រទេសចិនត្រូវគេរំពឹងថា ចំនួននេះនឹងកើនឡើង ដល់ ២.៨លាននាក់ត្រឹមឆ្នាំ ២០២២៕
ដោយ៖ លង់ វណ្ណៈ
