Doogee V ​ដែល​ទើប​បង្ហាញ​ខ្លួន តែ​មិន​ទាន់​ច្បាស់​អំពី​លក្ខណៈ​សម្បត្តិ​នៅ​ឡើយ​នោះ ពេល​នេះ​មាន​សេចក្ដី​រាយការណ៍​មក​ថា នឹង​ត្រូវ​ណែនាំ​ក្នុង​ព្រឹត្តិការណ៍ MWC 2018 ​ថ្ងៃ​ទី២៧ កុម្ភៈ​ខាង​មុខ​នេះ។ Doogee V ​ជា​ស្មាតហ្វូន​មាន​រចនាបថ​រូបរាង​ស្រដៀង​ខ្លាំង​ទៅ​នឹង iPhone X ដែល​មាន​គែម​អេក្រង់​ស្ដើង ស្លីម និង​មាន​ផ្នែក​ខាង​លើ​រាង​ឆក។ ចំណុច​ពិសេស​លើស iPhone X ​គឺ Doogee V នេះ​ត្រូវ​បាន​បង្កប់​មុខងារ​ស្កេន​ក្រយៅដៃ​ក្រោម​កញ្ចក់​អេក្រង់​តែម្ដង។ https://youtu.be/GIKOYOLPLeU តាម​ពិត​ក្រុមហ៊ុន Vivo ​បាន​ដើរ​មុន​មួយ​ជំហាន​ទៅ​លើ​ការ​អភិវឌ្ឍ​ស្មាតហ្វូន​មាន fingerprint បង្កប់​ក្រោម​អេក្រង់​គឺ​ស្មាតហ្វូន X20 Plus UD ចំណែក​ពេល​នេះ គឺ​ជា​ពេល Doogee បង្ហាញ​សាច់ដុំ​នឹង​ដែរ ជាមួយ​ស្មាតហ្វូន​ទី២ ដែល​មាន​បច្ចេកវិទ្យា​ទំនើប​បែប​នេះ។ Doogee នឹង​ត្រូវ​បង្ហាញ​ផ្លូវការ​ក្នុង​ព្រឹត្តិការណ៍​ថ្ងៃ​ទី២៧ កុម្ភៈ​នៅ​ព្រឹត្តិការណ៍ MWC 2018 ដែល​ប្រារព្ធ​ធ្វើ​នៅ​ក្រុង Barcelona ​ប្រទេស​អេស្ប៉ាញ។

Doogee V នឹង​មាន​អេក្រង់​ប្រភេទ AMOLED ទំហំ ៦,២១អ៊ីញ និង​សមាមាត្រ​អេក្រង់​នៅ 18:9 ​ratio ​ហើយ​មាន​កម្រិត Full HD+ (2160x1080)px។ វា​ជា​ស្មាតហ្វូន​មាន​ផ្ទៃ​មុខ​លាត ពុំ​មាន​ប្រើ​ប៊ូតុង​នៅ​ផ្នែក​ខាង​មុខ​ឡើយ ក្រៅតែ​ពី​ចំណុច​ចាប់អារម្មណ៍​នៅ​ត្រង់​ក្បាល​ឆក​របស់​វា។ កាមេរ៉ា​ខាង​មុខ​របស់​វា ត្រូវ​គេ​រំពឹង​ថា នឹង​គាំទ្រ​មុខងារ FaceID ផង​ដែរ។

ក្រឡេក​មើល​កាមេរ៉ា​ក្រោយ​វិញ គឺ​ជា​ dual camera ​អម​ដោយ​ភ្លើង​ជំនួយ​ប្រភេទ dual-LED flash។ ក្រុមហ៊ុន Doogee ​បាន​បញ្ជាក់​ថា ប្រព័ន្ធ​កាមេរ៉ា​ភ្លោះ​នៅ​លើ Doogee V ​គឺ​មាន​ទំហំ 16MP និង 8MP ​ប៉ុន្តែ​មិន​បាន​បញ្ជាក់​អំពី​សមត្ថភាព​យ៉ាងណា​នៅ​ឡើយ តែ​គេ​ជឿ​ថា នឹង​មាន​លទ្ធភាព​ក្នុង​ការ​កែ​ផ្ទៃ​ background ​ឱ្យ​មាន​លក្ខណៈ​ព្រាល ដូច​ជា​ bokeh effect ផង​ដែរ។ Doogee V ​មាន​រន្ធ​តំណភ្ជាប់ USB-C ​ហើយ​មាន​កម្លាំង​ថ្ម 4000mAh ។ ក្រុមហ៊ុន​មិន​បាន​ប្រាប់​ឱ្យ​ដឹង​នូវ​ប្រភេទ​ឈីប RAM ឬ​អង្គ​ចងចាំ​របស់​វា​នៅ​ឡើយ គ្រាន់តែ​បង្ហើប​ថា អាច​នឹង​ប្រព័ន្ធ AI ។ រង់ចាំ​មើល​ទាំង​អស់​គ្នា​តើ iPhone X clone ដើរ​ដោយ Android នេះ នឹង​មាន​អ្វី​ពិសេស​ខ្លះ? ដោយ៖ រឹទ្ធិរាជ ប្រភព៖ gsmarena