កើតមកទទេ ស្លាប់ទៅវិញក៏ទទេដែរ
នៅក្នុងឆាកជីវិតរបស់មនុស្សម្នាក់ៗ សុទ្ធតែធ្លាប់សួរខ្លួនឯងនូវសំណួរថា តើអត្ថន័យជីវិតរបស់ខ្ញុំគឺជាអ្វី ? គ្រប់មនុស្សនៅលើលោកទាំងអស់ កើតមកទទេ ស្លាប់ទៅវិញក៏ទទេដែរ។
នៅពេលអ្នកកំពុងសិក្សា គេនឹងសួរនាំអ្នកថាអ្នករៀននិទ្ទេសអ្វី មុខជំនាញអ្វី លុះដល់អ្នកបញ្ចប់ការសិក្សាពីសាលា គេក៏នឹងសួរអ្នកបន្តទៀតថាតើអ្នកមានការងារអ្វី ហើយប្រាក់ខែប៉ុន្មាន មុខតំណែងអ្វី បន្ទាប់មកនៅពេលអ្នកចាស់ទុំបន្តិចទៅ ក៏នឹងមានសំណួរបន្តទៀតថាតើអ្នកមានគ្រួសារឬនៅ រហូតដល់ចុងបញ្ចប់នៃឆាកជីវិតរបស់យើងម្នាក់ៗ។
មនុស្សយើងទោះជាបុគ្គលនោះមានទ្រព្យច្រើនប៉ុណ្ណា មានបុណ្យស័ក្ដិអង់អាចប៉ុណ្ណា ក៏គ្មាននរណាអាចគេចផុតពីច្បាប់ធម្មជាតិកើតចាស់ឈឺស្លាប់នេះដែរ។ កើតមកទទេ ស្លាប់ទៅវិញក៏ទទេដែរ។ តើអត្ថន័យជីវិតរបស់អ្នកគឺជាអ្វី ? តើអ្នករស់នៅដើម្បីអ្វី ? តើសេចក្ដីសុខគឺជាអ្វីយ៉ាងពិតប្រាកដ ? ហេតុអ្វីក៏មានពេលខ្លះជីវិតលំបាកម្ល៉េះ ? មនុស្សយើងមានរូបគឺមានទុក្ខហើយ។ ប៉ុន្តែ អ្នកត្រូវដឹងថាការគិតរបស់អ្នកមានអំណាចខ្លាំងក្លាណាស់។ ដូចព្រះពុទ្ធមានពុទ្ធដីកាថា បើអ្នកគិតបែបណា អ្នកនឹងក្លាយជាបែបនោះ។
មនុស្សយើងគ្រប់គ្នាសុទ្ធតែមានចំណង់និងកិលេសតណ្ហា។ បើបានរបស់នេះមកផ្គាប់ចិត្តឥឡូវនេះហើយ ក៏នឹងចង់បានអ្វីថ្មីផ្សេងមកផ្គាប់ចិត្តចង់របស់ខ្លួនទៀត ហើយចំណង់របស់ចិត្តនេះមិនចេះចប់មិនចេះហើយនោះឡើយ។ យើងមិនអាចចៀសផុតពីកិលេសតណ្ហាទាំងនោះបានទាំងស្រុងនោះឡើយ។ ដូចជាទ្រព្យជាដើម បើសិនជាយើងមិនយកចិត្តទុកដាក់ខិតខំរកប្រាក់ទេ នោះយើងប្រាកដជាដាច់បាយស្លាប់មិនខាន។ ប៉ុន្តែអ្នកក៏មិនគួរឈ្លក់វង្វេងជាមួយនឹងសេចក្ដីសុខក្លែងក្លាយអស់ទាំងនោះដែរ ហើយសូមឲ្យធ្វើនូវអ្វីដែលសុចរិត។
កើតមកទទេ ស្លាប់ទៅវិញក៏ទទេ តែបើអ្នកបានធ្វើនូវអំពើល្អ បើទោះជាមានគេដឹងឬមិនដឹងក៏ដោយ យ៉ាងហោចណាស់ក៏អ្នកខ្លួនឯងមានសេចក្ដីស្ងប់សុខក្នុងចិត្តដែរ ហើយសេចក្ដីសុខនេះនឹងចូលរួមបំពេញនូវអត្ថន័យនៃជីវិតរបស់អ្នក។ ធ្វើល្អកុំដោយសារតែមានការភ័យខ្លាចឬតាមគេឯងទើបធ្វើ តែចូរអ្នកធ្វើវាដោយសេចក្ដីស្មោះត្រង់នឹងខ្លួនឯង ធ្វើអំពើល្អដោយសារតែអ្នកស្គាល់ពីតម្លៃនៅខាងក្នុងចិត្តគំនិតរបស់ខ្លួន នោះទើបជាការប្រសើរខ្ពង់ខ្ពស់បំផុត។ ដូចអាល់ប៊ឺត អាញស្តាញ ធ្លាប់និយាយថា៖ "ចូរកុំព្យាយាមធ្វើជាមនុស្សដែលជោគជ័យ តែព្យាយាមធ្វើជាមនុស្សដែលមានតម្លៃ"។
បើអ្នកយល់ពីចំណុចនេះបាន នោះអ្នកនឹងអាចរកឃើញថាខ្លួនឯងជានរណាយ៉ាងពិតប្រាកដ ហើយសេចក្ដីសុខរបស់អ្នកគឺជាអ្វីយ៉ាងពិតប្រាកដមិនខាន៕
ដោយ៖ ស្រីពៅ
