មានវិធីបែបណា ដើម្បីទទួលបាននូវភាពជោគជ័យដែលអ្នកចង់បាន?
មានឃ្លាមួយបានលើកឡើងថា បើសិនជាអ្នកមិនទៅតាមអ្វីដែលអ្នកចង់បានទេ នោះអ្នកនឹងមិនទទួលបានវាក្នុងជីវិតអ្នកអស់មួយជីវិត ហើយបើអ្នកមិនឈានជើងចាកចេញពីទីកន្លែងដែលអ្នកកំពុងតែឈរនោះទេ នោះអ្នកនឹងបន្តនៅទីនោះជារៀងរហូត។
ភាពជោគជ័យមិនមែនជារបស់ទទេៗដែលនរណាក៏អាចទទួលបាននោះទេ។ ភាពជោគជ័យគឺជាកម្មសិទ្ធិសម្រាប់តែបុគ្គលណាដែលមានការតស៊ូអត់ធ្មត់ពិតប្រាកដប៉ុណ្ណោះ។ ក៏គ្មាននោះដែរជណ្ដើរយន្តសម្រាប់នាំអ្នកទៅកាន់ភាពជោគជ័យដោយងាយៗនិងស្រាប់ៗនោះ។
ដូច Wayne Huizenga បាននិយាយថា៖ "មនុស្សមួយចំនួនដេកសុបិនចង់ទទួលបានជោគជ័យ ខណៈពេលមនុស្សមួយចំនួនវិញក្រោកពីព្រលឹមជារៀងរាល់ព្រឹកដើម្បីធ្វើវាឲ្យក្លាយជាការពិត"។
ឧទាហរណ៍ជាក់ស្ដែងដូចលោក Elon Musk គាត់ធ្លាប់និយាយពាក្យមួយឃ្លានៅក្នុងការសម្ភាសមួយថា៖ "បើសិនជាទាល់តែមានគេលើកសរសើរនិងផ្ដល់កម្លាំងចិត្តដល់អ្នកទើបអ្នកអាចធ្វើអ្វីដែលអ្នកចង់ធ្វើបាន នោះអ្នកមិនចាំបាច់ធ្វើវានោះទេ"។
គាត់គឺជាបុគ្គលដ៏មានគំនិតច្នៃប្រឌិតខ្ពស់មួយរូបដែលតែងតែសម្លឹងឆ្ពោះទៅមុខជានិច្ច និងពោរពេញដោយជំនឿទុកចិត្តទៅលើអ្វីដែលខ្លួនឯងកំពុងធ្វើ បើទោះជាទទួលបានការរិះគន់ពីមនុស្សជុំវិញខ្លួនក៏ដោយ។ គាត់ជោគជ័យនៅក្នុងការសាងសង់រ៉ុកកែតដែលអាចបញ្ជូនមនុស្សលោកទៅកាន់ភពព្រះអង្គារ មិនតែប៉ុណ្ណោះរ៉ុកកែតនេះថែមទាំងអាចប្រើប្រាស់ម្ដងទៀតបន្ទាប់ពីបានប្រើប្រាស់ជាលើកដំបូងរួចហើយផងដែរ។
លោកក៏ជាសហគ្រិនដ៏ជោគជ័យនិងលេចធ្លោមួយរូបរបស់ក្រុមហ៊ុន Tesla ដែលបានផលិតរថយន្តដើរដោយអគ្គិសនី និងបានសាងភាពជោគជ័យជាច្រើនរាប់មិនអស់ទៀត បន្ទាប់ពីបានឆ្លងកាត់ការបរាជ័យច្រើនមិនអស់កន្លងមកដូចគ្នាដែរ។ ជ័យជម្នះអ្វីក៏ដោយសុទ្ធតែត្រូវឆ្លងកាត់ជ័យជម្នះលើខ្លួនឯងជាមុនសិន ពោលគឺអ្នកត្រូវស្រមៃឃើញខ្លួនឯងជោគជ័យនិងត្រូវមានជំនឿថាអ្នកនឹងអាចធ្វើបានដំបូងបង្អស់ បន្ទាប់មកទើបអ្នកអាចទប់ទល់ជាមួយនឹងឧបសគ្គផ្សេងៗនៅខាងក្រៅបាន៕
