សម្រង់សម្ដីអប់រំជីវិត ៧ឃ្លាពីស្ថាបនិកក្រុមហ៊ុន Apple លោក ស្ទីវចប
អ្នកស្គាល់រួចមកហើយថាស្ថាបនិកក្រុមហ៊ុន Apple ដែលអាចជាផលិតទូរស័ព្ទឬឡេបថបដែលអ្នកកំពុងតែប្រើប្រាស់នេះគឺជា លោក ស្ទីវចប ហើយអ្នកក៏ប្រាកដជាដឹងដែរហើយថាកេរ្តិ៍ឈ្មោះរបស់គាត់មានភាពល្បីល្បាញប៉ុណ្ណា។ ប៉ុន្តែអ្នកប្រហែលជាមិនធ្លាប់បានដឹងទេថា គាត់បានបន្សល់ទុកនូវសម្ដីជាច្រើនដែលពោរពេញដោយអត្ថន័យអប់រំជីវិតដែលមានដូចសម្ដី៧ឃ្លាខាងក្រោមនេះ។
១) "បានក្លាយជាអ្នកមានទ្រព្យជាងគេបំផុតនៅក្នុងផ្នូរមិនសំខាន់សម្រាប់ខ្ញុំនោះទេ។ ប៉ុន្តែ បើបានចូលគេងយប់ឡើង និងបាននិយាយថាពួកយើងបានសម្រេចរឿងអ្វីមួយដែលអស្ចារ្យ នោះទើបវាសំខាន់សម្រាប់ខ្ញុំពិតប្រាកដ"។
២) "ភាពច្នៃប្រឌិតគ្រាន់តែជាការមើលឃើញអ្វីៗមានទំនាក់ទំនងជាមួយគ្នាប៉ុណ្ណោះ"។
៣) "កុំអនុញ្ញាតឲ្យសំឡេងរំខានរបស់អ្នកដទៃលុបបំបាត់សំឡេងនៅខាងក្នុងរបស់អ្នកបានឲ្យសោះ"។
៤) "ភាពសាមញ្ញអាចពិបាកជាងភាពស្មុគស្មាញសាំញ៉ាំទៅទៀត។ អ្នកត្រូវប្រឹងប្រែងខ្លាំងដើម្បីឲ្យចិត្តគំនិតរបស់អ្នកជ្រះស្រឡះស្អាត នោះទើបអ្នកអាចធ្វើនូវរឿងដ៏សាមញ្ញបាន។ ប៉ុន្តែវាគឺជារឿងដ៏មានតម្លៃសម្រាប់អ្នកគួរធ្វើ ព្រោះថាបើកាលណាអ្នកធ្វើវាបានហើយ នោះអ្នកនឹងអាចរំកិលភ្នំបានជាមិនខាន"។
៥) "ពេលវេលារបស់អ្នកមានដែនកំណត់ ហេតុនេះហើយអ្នកមិនគួរខ្ជះខ្ជាយវាដើម្បីរស់នៅជីវិតអ្នកដទៃនោះឡើយ"។
៦) "ចងចាំជានិច្ចថាចុងក្រោយបំផុតទៅអ្នកគង់នឹងត្រូវស្លាប់ គឺជាវិធីដ៏ល្អបំផុតមួយដើម្បីគេចចេញពីអន្ទាក់នៃការគិតដែលយល់ថាអ្នកនឹងមានអ្វីដែលនឹងត្រូវបាត់បង់។ អ្នកទទេស្អាតស្រាប់ទៅហើយ ដូច្នេះវាគ្មានហេតុផលអ្វីនោះឡើយដែលអ្នកមិនគួរដើរតាមបេះដូងរបស់ខ្លួនឯងនោះ។
៧) "នៅពេលអ្នកធំឡើង អ្នកនឹងតែងតែត្រូវបានគេប្រាប់ថាពិភពលោកដែលអ្នករស់នៅនេះគឺតែងតែបែបនេះរហូតមកហើយ ហើយឆាកជីវិតរបស់អ្នកគ្រាន់តែជាការរស់នៅជីវិតរបស់អ្នកនៅក្នុងពិភពលោកបែបនេះទៅ។ កុំព្យាយាមជល់ក្បាលខ្លួនឯងទៅនឹងជញ្ជាំងខ្លាំងពេកអី។ តែព្យាយាមកសាងគ្រួសារដ៏ល្អមួយ មានភាពសប្បាយរីករាយ និងសន្សំលុយកាក់បន្តិចបន្តួចទៅបានហើយ។ ការរស់នៅបែបនេះគឺជាជីវិតមួយដែលមានដែនកំណត់ជាទីបំផុត។ ឆាកជីវិតអាចធំធេងជាងនេះទៅទៀត ដរាបណាអ្នករកឃើញនូវការពិតមួយថា អ្វីគ្រប់យ៉ាងនៅជុំវិញខ្លួនអ្នកដែលអ្នកហៅថាជីវិតនេះ គឺត្រូវបានបង្កើតឡើងដោយមនុស្សទាំងឡាយដែលពួកគេមិនឆ្លាតជាងអ្នកប៉ុន្មាននោះទេ ហើយអ្នកអាចផ្លាស់ប្ដូរវាបាន អ្នកអាចបង្កើតឥទ្ធិពលរបស់អ្នកទៅលើវាបាន។ នៅពេលមួយដែលអ្នកបានយល់ពីការពិតមួយនេះហើយ នោះអ្នកនឹងមិនមែនជាមនុស្សដូចកាលពីមុនទៀតនោះឡើយ"។
ប្រភព៖ goalcast ប្រែសម្រួល៖ ស្រីពៅ
