គន្លឹះ ៣យ៉ាងខាងក្រោមនេះ អាចជួយអ្នកឲ្យជោគជ័យក្នុងជំនួញ
អ្នកជំនួញគ្រប់រូបតែងតែធ្វើអ្វីដែលខ្លួនឯងស្រឡាញ់និងកែប្រែចំណង់ឲ្យចេញជារូបរាង។ ប៉ុន្តែ សេចក្ដីភ័យខ្លាចនិងភាពបរាជ័យតែងតែជាឧបសគ្គមួយសម្រាប់អ្នកជំនួញគ្រប់រូប។ ពេលខ្លះ អ្នកខំប្រឹងគ្មានពេលសម្រាក គ្មានថ្ងៃអាទិត្យផង ប៉ុន្តែដូចមិនឃើញលទ្ធផលសោះ។
ប៉ុន្តែ ជំនួញគឺវាអ៊ីចឹងឯង វាតែងតែមានពេលឡើងនិងមានពេលចុះ។ ប្រសិនអ្នកកំពុងតែជួបបញ្ហាក្នុងជំនួញ សាកល្បងគន្លឹះខាងក្រោមនេះទៅមើល៍៖
១) កសាងម៉ាកយីហោឲ្យចេញពីចិត្ត
មនុស្សទិញផលិតផលរបស់អ្នកមិនមែនដោយសារផលិតផលរបស់អ្នកទាំងស្រុងនោះទេ។ មនុស្សទិញផលិតរបស់អ្នកដោយសារតែពួកគាត់ស្គាល់ពីអ្នក ស្គាល់ពីក្រុមហ៊ុនរបស់អ្នក ហើយទទួលបានទំនុកចិត្តទើបទិញ។ ដូច្នេះហើយ អ្នកត្រូវកសាងម៉ាកយីហោឲ្យបានល្អនិងរក្សាទំនាក់ទំនងឲ្យបានល្អជាមួយអតិថិជន។
២) តាំងចិត្តប្រសិនអ្នកនៅមានភាពភ័យខ្លាច
ធ្វើជំនួញតែងតែមានហានិភ័យអ៊ីចឹងឯង។ ពេលខ្លះអ្នកខាតលុយ ពេលខ្លះក៏ខកចិត្តនៅពេលអ្វីៗមិនដើរតាមចិត្តចង់បាន។ ប៉ុន្តែប្រសិនអ្នកខ្លាចបរាជ័យនោះក៏មានន័យថាអ្នកខ្លាចជោគជ័យផងដែរ។ វិធីតែម៉្យាងនោះគឺអ្នកត្រូវតាំងចិត្តឲ្យបានខ្ពស់និងហ៊ានប្រឈមមុខនឹងអ្វីៗគ្រប់យ៉ាង។
៣) បើមិនចេះ ត្រូវចេះរកមនុស្ស៖
ពេលខ្លះ អ្នកមិនចេះទាំងអស់នោះទេ នេះជារឿងពិតដែលមិនអាចប្រកែកបាន។ ហើយពេលខ្លះ វាក៏ពិបាកក្នុងរកជំនួយពីអ្នកដទៃផងដែរព្រោះអ្នកខ្លះក៏រវល់ អ្នកខ្លះក៏មិនមានចិត្ត។ យ៉ាងណាមិញ ប្រសិនជាអ្នកមិនចេះផ្នែកណា អ្នកគួររកមនុស្សដែលពូកែផ្នែកនោះមកធ្វើការជាមួយអ្នកម្ដងទៅ។ វាល្អទាំងអស់គ្នា៕
ប្រែសម្រួល៖ អឹុង មុយយូ ប្រភព៖ addicted2success.com
