ហេតុផល ២យ៉ាងធំៗដែលបង្ហាញថា ការទិញអចលនទ្រព្យគឺជាការវិនិយោគមិនល្អ
តម្លៃផ្ទះកាន់តែឡើងថ្លៃទៅៗ។ ឯប្រជាជនក៏នាំគ្នាទិញអចលនទ្រព្យបើទោះបីជាគ្មានលុយនៅក្នុងខ្លួន។ អ្នកខ្លះសុទ្ធចិត្តខ្ចីលុយធនាគារ បង់រំលោះប្រចាំខែ អត់ស៊ីអត់ឃ្លានដើម្បីទិញផ្ទះផ្ទាល់ខ្លួនមួយ។ ពិតណាស់ថា នរណាម្នាក់ក៏ចង់មានផ្ទះផ្ទាល់ខ្លួនផងដែរ។ ប៉ុន្តែ ការទិញអចលនទ្រព្យអាចជាបំណុលហើយក៏អាចជាការវិនិយោគដ៏អាក្រក់បំផុត។ ហេតុផល២យ៉ាងធំៗខាងក្រោមនេះនឹងបង្ហាញថាការទិញអចលនទ្រព្យគឺជាការវិនិយោគដ៏អាក្រក់៖
១) ប្រសិនអ្នកទិញផ្ទះដោយបង់រំលោះជាប្រចាំខែរយៈពេលវែងខ្លាំង៖ សម័យកាលកាន់តែអភិវឌ្ឍន៍ ប្រជាជនក៏មានជម្រើសកាន់តែច្រើនក្នុងការទិញផ្ទះ។ តាមគម្រោងផ្ទះខ្លះ អ្នកអាចបង់រំលោះផ្ទះដល់ទៅ២០ឆ្នាំឯណោះ ដោយការប្រាក់ត្រឹមតែ១%តែប៉ុណ្ណោះ។ ១%ស្តាប់ទៅតិចមែន ប៉ុន្តែដោយសារតែអ្នកខ្ចីលុយខ្ទង់ម៉ឺននិងសងក្នុងរយៈវែង អ្នកអាចទិញផ្ទះដល់ទៅ ២ឯណោះប្រសិនបើបូកសរុបការប្រាក់ទាំងអស់។ ឧទាហរណ៍ថា ផ្ទះតម្លៃដើមគឺ ៨៤ ០០០ដុល្លារ។ ប្រាក់ដែលអ្នកត្រូវបង់គឺ ៤១២ដុល្លារបូកនឹងការប្រាក់ អ្នកត្រូវបង់៩៧៧ដុល្លារក្នុង១ខែ។ ហើយអ្នកត្រូវបង់រយៈពេល១៧ឆ្នាំឯណោះ។ ដូច្នេះ ការទិញផ្ទះរបៀបនេះមិនមែនជាការវិនិយោគនោះទេ ប៉ុន្តែវាជាបំណុលទៅវិញ។
២) គ្មានលុយទៅធ្វើអ្វីផ្សេង៖ ប្រសិនអ្នកទិញផ្ទះដោយការបង់រំលោះហើយសម្រាប់នៅផ្ទាល់ខ្លួន ប្រាក់ដែលអ្នករកទាំងប៉ុន្មាននឹងត្រូវទុកសម្រាប់បង់ផ្ទះ។ ប្រសិនជាអ្នកជួលផ្ទះនៅបណ្ដោះអាសន្ន ហើយអ្នកយកលុយដែលអ្នកមានទៅវិនិយោគ ទៅរកស៊ីដើម្បីបង្កើតប្រាក់ចំណូល ហើយសន្សំលុយដើម្បីទិញផ្ទះដោយបង់ជាដំណាក់កាលឬបង់ផ្ដាច់តែម្ដង នោះអ្នកសន្សំលុយពីការបង់ការប្រាក់ទៅធនាគារនិងទិញផ្ទះក្នុងតម្លៃសមរម្យ៕
ដោយ៖ មុយយូ
