ក្រុមហ៊ុន Apple ​មិន​ទាន់​បញ្ចេញ​របាយការណ៍​ស្ដី​ពី​តួលេខ​ចែកចាយ​នាឡិកា Apple Watch របស់​ខ្លួន​ផង​ទេ។ ប៉ុន្តែ​ថ្មីៗ​នេះ គេហទំព័រ​វិភាគ​ទីផ្សារ Canalys ​ទើប​បាន​បង្ហាញ​របាយការណ៍​ស្រាវជ្រាវ​របស់​ខ្លួន​ថា Smartwatch របស់​ក្រុមហ៊ុន​អាមេរិក​នេះ លក់​ដាច់​ក្នុង​ឆ្នាំ២០១៧ ប្រមាណ ១៨លាន​គ្រឿង។ នេះ​ជា​តួលេខ​កើនឡើង​ប្រមាណ ៥៤% ​ប្រៀបធៀប​កាលពី​ឆ្នាំ​ទៅ។

យោងតាម​របាយការណ៍​ដដែល​នេះ ឱ្យ​ដឹង​ទៀត​ថា Smartwatch ​របស់ Apple ​ម៉ូដែល​មាន Cellular ​ទទួល​បាន​ការ​ពេញ​និយម​ខ្លាំង គឺ​លក់​ដាច់​បាន​ច្រើន។ ចំនួន​លក់ Smartwatch ​ជំនាន់​ទី៣ ​នេះ គឺ​មាន​ការ​កើនឡើង​ប្រហែល ៤៨% សម្រាប់​ឆ្នាំ២០១៧។

ក្រុមហ៊ុន Apple ​កំពុង​ពង្រីក​ទីផ្សារ Smartwatch ​របស់​ខ្លួន​ទៅ​កាន់​បណ្ដា​ប្រទេស​ច្រើន​បន្ថែម​ទៀត ​ដូច​ជា ហុងកុង និង​សិង្ហបុរី។ ចុះ​ចំណែក​ឆ្នាំ​២០១៨ នេះ​វិញ តើ Apple នឹង​នៅ​តែ​អាច​រក្សា​ស្ថានភាព​ទីផ្សារ Apple Watch របស់​ខ្លួន​បាន​ដែរ​ឬ​ទេ? ដោយ៖ រឹទ្ធិរាជ ប្រភព៖ Canalys