គោលការណ៍ទាំង៤ប្រការសម្រាប់បំផុសកម្លាំងចិត្តអ្នកក្នុងការផ្លាស់ប្ដូរជីវិត
ទង្វើរបស់អ្នក គឺជាផលិតផលដែលបានពីការគិតរបស់អ្នក ឬអាចនិយាយម្យ៉ាងទៀតថា ការគិតរបស់អ្នកបង្គាប់បញ្ជាទៅលើទង្វើ និងការប្រព្រឹត្តរបស់អ្នក។ ដូច្នេះ បើអ្នកចង់ផ្លាស់ប្ដូរជីវិតរបស់អ្នក អ្នកត្រូវផ្លាស់ប្ដូរពីវិធីនៃការគិតរបស់អ្នកចំពោះខ្លួនឯង និងពិភពលោកដែលអ្នកមើលឃើញជាមុនសិន។ ការស្វែងរកកម្លាំងចិត្តសម្រាប់ជំរុញអ្នកឲ្យមានការផ្លាស់ប្ដូរទៅលើជីវិតរបស់អ្នក គឺស្ថិតនៅក្នុងចិត្តរបស់អ្នក មិនមែនជាការទទួលបានវាពីរបស់ខាងក្រៅនោះឡើយ។ ដូច្នេះ ដើម្បីស្វែងរកកម្លាំងចិត្តសម្រាប់ផ្លាស់ប្ដូរជីវិត អ្នកត្រូវចាប់ផ្ដើមជាមួយគោលការណ៍ទាំង៤ប្រការនេះជាមុនសិន៖
១) ផ្លាស់ប្ដូរឥរិយាបថរបស់អ្នក៖ ការផ្លាស់ប្ដូរឥរិយាបថ គឺជាមូលដ្ឋានគ្រឹះឆ្ពោះទៅកាន់ការផ្លាស់ប្ដូរក្នុងជីវិតរបស់អ្នក។ អ្វីក៏ដោយដែលកើតមកលើជីវិតអ្នក ទាំងភាពសប្បាយរីករាយ ទាំងទុក្ខកង្វល់ អ្វីទាំងនោះសុទ្ធតែអាស្រ័យទៅលើឥរិយាបថ និងការឆ្លើយតបរបស់អ្នកទៅលើវា។ នៅពេលអ្នកជួបប្រសព្វនឹងហេតុការណ៍ផ្សេងៗក្នុងជីវិត អ្នកមានសិទ្ធិជ្រើសរើសឆ្លើយតបទៅកាន់វាបែបណា នោះលទ្ធផលដែលអ្នកទទួលបាននឹងទៅជាបែបនោះទៅតាមការជ្រើសរើសរបស់អ្នកដែរ។
២) មានការទទួលខុសត្រូវទៅលើរាល់ហេតុការណ៍ក្នុងជីវិត៖ នេះគឺជាជីវិតរបស់អ្នក អ្វីគ្រប់យ៉ាងដែលកើតឡើងមកលើជីវិតអ្នក វាគឺជាការទទួលខុសត្រូវរបស់អ្នកតែម្នាក់គត់ចំពោះវា។ អ្នកត្រូវទទួលយកនូវរាល់លទ្ធផលទាំងឡាយនៅក្នុងជីវិត មិនថាវាកើតមកពីកំហុសរបស់អ្នកក៏ដោយ តែអ្វីដែលសំខាន់ គឺអ្នកត្រូវរៀនសូត្រពីកំហុសនោះ យកមេរៀនទាំងនោះមកកែប្រែបច្ចុប្បន្នភាពរបស់អ្នកឲ្យកាន់តែប្រសើរជាងមុន នៅពេលនោះ អ្នកនឹងមានអំណាចគ្រប់គ្រងទៅលើជីវិតរបស់ខ្លួន ដែលវាគឺជាប្រភពនៃកម្លាំងចិត្តរបស់អ្នកក្នុងការផ្លាស់ប្ដូរ។
៣) លុបចោលនូវពាក្យថា "មិនអាច" និងលេសអះអាងទាំងឡាយ៖ ដើម្បីបណ្ដុះនូវកម្លាំងចិត្តសម្រាប់ខ្លួនឯង អ្នកត្រូវមានភាពជឿជាក់ទៅលើភាពអស្ចារ្យ សក្ដានុពល និងឱកាសរបស់ខ្លួន។ ការរកលេសអាងមកគាំទ្រខ្លួនឯងពីការចៀសវាងធ្វើអ្វីមួយដែលជំរុញឲ្យមានការផ្លាស់ប្ដូរនៅក្នុងជីវិត គឺជារឿងងាយស្រួលនោះទេ ប៉ុន្តែក្នុងមួយជីវិតនេះ អ្នកនឹងនៅតែទទួលបានអ្វីដដែលៗសម្រាប់ជីវិតខ្លួនឯង។ ឆាកជីវិតប្រហែលជាមិនងាយស្រួលនោះទេ ប៉ុន្តែបើអ្នកផ្ដល់ឱកាសដល់ខ្លួនឯងសម្រាប់ការផ្លាស់ប្ដូរ នោះជោគជ័យនឹងសន្សឹមៗរត់មករកអ្នកដោយខ្លួនឯងមិនខាន។
៤) ប្ដេជ្ញាចិត្តយ៉ាងមុតមាំ៖ កម្លាំងចិត្ត ទទួលបានមកពីការប្ដេជ្ញាចិត្តក្នុងការសម្រេចគោលដៅអ្វីមួយសម្រាប់ជីវិត និងប្រឹងប្រែងពុះពារសម្រេចវាឲ្យបានមិនថាមានឧបសគ្គបែបណាក៏ដោយ។ របស់ដែលមានតម្លៃ នឹងមិនទទួលបានមកដោយងាយស្រួលនោះឡើយ វាទាមទារនូវពេលវេលាក្នុងរយៈពេលយូរ ភាពអត់ធ្មត់ និងឆន្ទៈដ៏ខ្លាំងក្លារបស់អ្នកក្នុងការសម្រេចវាឲ្យបានជោគជ័យ។ ទោះជាបែបនេះក៏ដោយ នាដំណាក់កាលនោះ កម្លាំងចិត្តអ្នកនឹងដុតបញ្ឆេះឡើងមកឥតឈប់ឈរ ពោរពេញទៅដោយភាពជឿជាក់សម្រាប់ការផ្លាស់ប្ដូរនាពេលអនាគតនៅក្នុងជីវិត៕
ប្រភព៖ pickthebrain ប្រែសម្រួល៖ ស្រីពៅ
