ដំបូងឡើយ ក្រុមហ៊ុន HMD ដែលបានស្រោចស្រង់ Nokia ឡើងមកវិញ បានបញ្ចេញស្មាតហ្វូន Nokia 6 នៅលើទីផ្សារចិន និងបានលក់ដាច់ ១០០០០០គ្រឿង សម្រាប់ត្រីមាសទី១ (បើផ្អែកតាមរបាយការណ៍ IDC)។ ក្រុមហ៊ុនមានទំនុកចិត្តនឹងបន្តធ្វើឲ្យកើនឡើងចំណែកទីផ្សារស្មាតហ្វូន Nokia ទៅកាន់បណ្ដាប្រទេសកាន់តែច្រើន។
នៅត្រីមាសទី២ ក្រុមហ៊ុន Nokia បន្តណែនាំចេញស្មាតហ្វូនពីរម៉ូដែលបន្ថែមទៀតគឺ Nokia 5 និង Nokia 3។ ពេលនោះ គេឃើញការលក់បានកើនឡើងគួរកត់សម្គាល់ (លក់ដាច់ដំណាលគ្នានឹង Nokia 6) នៅលើទីផ្សារអន្តរជាតិ តែស្មាតហ្វូនថ្មីហាក់មិនទាន់ធ្វើបានល្អនៅលើទីផ្សារចិននៅឡើយ។
បរិមាណចែកចាយស្មាតហ្វូនប្រចាំត្រីមាសឃើញមានកំណើនឡើងរយៈពេល ៣ខែចុងក្រោយក្នុងឆ្នាំ២០១៧ ដោយ HMD បានលក់ដាច់ស្មាតហ្វូនលើទីផ្សារអន្តរជាតិកើនឡើង ១% សរុបគឺ ៨,៤៥លានគ្រឿង។ នេះបើផ្អែកតាមរបាយការណ៍ពី Counterpoint Research។ ប៉ុន្តែ HMD ថែមទាំងគ្រប់គ្រងម៉ាក Nokia ទៅលើស៊េរីទូរស័ព្ទ feature phone ផងដែរ។ នៅត្រីមាសទី៣ ទីផ្សារទូរស័ព្ទ feature phone របស់ Nokia លក់ដាច់បាន ១៣,៥លានគ្រឿង ហើយនៅត្រីមាសទី៤ ក៏ទទួលបានចំណាត់ថ្នាក់ Top 5 នៅប្រទេសឥណ្ឌា។ HMD មិនទាន់បានបញ្ចេញរបាយការណ៍ផ្លូវការចំពោះតួលេខលក់ស្មាតហ្វូនរបស់ខ្លួននៅឡើយ។ នេះគ្រាន់តែជាការរំពឹងទុកពីក្រុមអ្នកវិភាគទីផ្សារប៉ុណ្ណោះ៕
ដោយ៖ រឹទ្ធិរាជ
ប្រភព៖ gsmarena
