ខណៈ​ដែល ទ្រនាប់​ស្កេន​ក្រយៅដៃ​ Fingerprint reader កំពុង​ត្រូវ​គេ​ជំរុញ​អភិវឌ្ឍ​ឱ្យ​មក​ស្ថិត​ក្រោម​អេក្រង់​ទូរស័ព្ទ ដើម្បី​រចនា​រូបរាង​ឱ្យ​មាន​គែម​អេក្រង់​ស្ដើង​ពេញ​ទំហឹង​នោះ ចំណែក​ពេល​នេះ Samsung ​ទើប​បាន​បង្ហាញ​ប៉ាតង់​បច្ចេកវិទ្យា​ថ្មី​របស់​ខ្លួន អាច​ជា​សញ្ញាណ​ចាប់ផ្ដើម​នៃ​ការ​ប្ដូរ​របត់​ថ្មី ក្នុង​ការ​បង្កប់​កាមេរ៉ា​មុខ​ក្រោម​អេក្រង់​ទូរស័ព្ទ​ផង​ដែរ។

ប៉ាតង់​របស់ Samsung នេះ បាន​បង្ហាញ​ឱ្យ​ឃើញ​​គំនូស​តាង​ឧបករណ៍ ជា​គំរូ​ទូរស័ព្ទ ដែល​ត្រូវ​គេ​ផ្លាស់ប្ដូរ​គ្រឿង​បង្គំ​ទាំងឡាយ មក​ស្ថិត​នៅ​ក្រោម​កញ្ចក់​អេក្រង់ រួម​ទាំង​រន្ធ​សំឡេង​សម្រាប់​ស្ដាប់​ពេល​និយាយ​ទូរស័ព្ទ មុខងារ proximity និង ambient light sensor ផង​ដែរ។

ទោះជា​យ៉ាងណា បញ្ហា​គឺ​ថា បច្ចុប្បន្ន​មិន​ទាន់​មាន​ក្រុមហ៊ុន​ផលិត​កាមេរ៉ា​សម្រាប់​គាំទ្រ​ការ​បំពាក់​នៅ​ទីតាំង​ក្រោម​អេក្រង់​នៅ​ឡើយ។ តាមរយៈ​ប៉ាតង់​ថ្មី​នេះ វា​អាច​នឹង​ត្រូវ​ប្រើប្រាស់​អេក្រង់​ប្រភេទ OLED ​លក្ខណៈ​ថ្លា ជាមួយ​កម្រិត resolution ​ខ្ពស់ អាច​បើក និង​បិទ ​នៅ​ពេល​មិន​ត្រូវ​ការ​ប្រើ ហើយ​គេ​នឹង​មើល​មិន​ឃើញ​វា​ទេ ដែល​ផ្ដល់​ភាព​ស្រឡះ​ល្អ​នៅ​លើ​ផ្ទៃ​មុខ​ទូរស័ព្ទ៕ ​ដោយ៖ រឹទ្ធិរាជ ប្រភព៖ gsmarena