សារពិសេសពីStephen Hawkingសម្រាប់អ្នកបាក់ទឹកចិត្ត៖ «មិនថាជីវិតលំបាកប៉ុណ្ណាទេអ្នកនៅតែអាចធ្វើអ្វីមួយបាន ហើយអ្នកនៅតែអាចជោគជ័យ...»
«មិនថាជីវិតលំបាកប៉ុណ្ណាទេអ្នកនៅតែអាចធ្វើអ្វីមួយបាន ហើយអ្នកនៅតែអាចជោគជ័យ។ អ្វីដែលសំខាន់នោះ សូមកុំបោះបង់»។ នេះជាសម្ដីរបស់លោកStephen Hawkingជាអ្នកនិពន្ធដ៏ល្បីឈ្មោះរបស់អង់គ្លេស បើទោះបីជារាងកាយរបស់លោកពិការក្តី។
ជីវិតរបស់លោកStephen Hawkingឆ្លងកាត់ការលំបាកយ៉ាងខ្លាំង ជាពិសេសក្រោយពេលលោកបានកើតជម្ងឺម្យ៉ាងដែលធ្វើឲ្យលោកពិការ និង មិនអាចនិយាយបានដូចមនុស្សទូទៅ (ពោលគឺអាចនិយាយបានត្រឹមតែ១៥ពាក្យក្នុង១នាទី ដោយមានឧបករណ៍ជំនួយ)។ នៅពេលដែលលោកបានធ្លាក់ខ្លួនពិការ និង មិនអាចនិយាយបាននោះគ្រូពេទ្យបានព្រមានថា Stephen Hawkingនឹងស្លាប់ក្នុងរយៈពេល២ឆ្នាំក្រោយ។ ចំណុចនេះ ក៏រឹតតែធ្វើឲ្យលោកមានអារម្មណ៍បាក់ទឹកចិត្តខ្លាំងក្នុងជីវិត។ យ៉ាងណាក៏ដោយ បើទោះបីជាវាពិបាក និង ឈឺចាប់ប៉ុណ្ណាក៏ដោយ Stephen Hawkingមិនបានចុះញ៉មជាមួយនឹងស្ថានភាពដែលបានកើតឡើងនោះឡើយ ហើយលោកបានព្យាយាមស្វែងរកអ្វីមួយដែលសំខាន់ក្នុងជីវិត ហើយព្យាយាមប្រើជីវិតរបស់ខ្លួនឲ្យមានន័យ និង អស់លទ្ធភាព។ មិនត្រឹមតែមិនស្លាប់ ដូចការលើកឡើងរបស់គ្រូពេទ្យទេ Stephen Hawkingបានក្លាយទៅជាអ្នកប្រាជ្ញផ្នែករូបវិទ្យា និង ជាអ្នកនិពន្ធដ៏ល្បីឈ្មោះម្នាក់ក្នុងលោក បើទោះបីជាពិការក្តី។ ដោយសារតែឆ្លងកាត់បទពិសោធន៍ក្នុងជីវិតបែបនេះហើយ ទើបលោកបានផ្តាំទៅកាន់មនុស្សទាំងឡាយ ដែលកំពុងកើតទុក្ខឲ្យមានស្មារតីតស៊ូ ហើយព្យាយាមគិតវិជ្ជមានជានិច្ចចំពោះជីវិត។ ដរាបណា មិនបោះបង់ ផ្លូវជីវិតនឹងនៅតែមាន ហើយភាពជោគជ័យក្នុងជីវិតក៏មិនរលាយនោះដែរ៕ ដោយ៖ រតនា វិចិត្រ
