តើអ្វីទៅដែលកាត់ផ្ដាច់គ្នារវាងបុគ្គលដែលមានទេពកោសល្យ និង បុគ្គលជោគជ័យ ?
ជីវិតគឺជាការប្រកួតប្រជែង ប៉ុន្តែមនុស្សដែលអ្នកត្រូវតែប្រកួតជាមួយនោះគឺជាខ្លួនឯង។ មនុស្សជុំវិញខ្លួនអ្នក មិនមែនជាមនុស្សដែលអ្នកគួរប្រកួតប្រជែងជាមួយនោះឡើយ ព្រោះរាល់មនុស្សដែលអ្នកបានជួបនិងស្គាល់សុទ្ធតែជាមនុស្សដែលអាចឲ្យអ្នករៀនសូត្របាន។ មិនថាបុគ្គលម្នាក់នោះជាប្រភេទបុគ្គលបែបណាក៏ដោយ នៅពេលអ្នកបន្ទាបខ្លួនហើយដាក់ចិត្តរៀនសូត្រពីចំណុចតូចតាចដែលបង្កប់នៅក្នុងបុគ្គលិកលក្ខណៈនិងតម្លៃរបស់ពួកគេម្នាក់ៗ នោះអ្នកប្រាកដជាអាចសម្គាល់ឃើញនូវមេរៀនដែលអ្នកគួរចៀសវាងកុំយកគំរូតាម និងមេរៀនមានតម្លៃដែលអ្នកគួររៀនសូត្រតាមពួកគេ។
មនុស្សតែម្នាក់គត់ ដែលអ្នកគួរយកចិត្តទុកដាក់ត្រួតពិនិត្យមើលជាប្រចាំឲ្យម៉ត់ចត់ នោះគឺជាខ្លួនឯង ហើយដំណើរការណ៍នេះនឹងគ្មានទីបញ្ចប់នោះឡើយ។ មានឃ្លាមួយរបស់អ្នកនិពន្ធ StepKing hen បានលើកឡើងដូច្នេះថា៖ "ទេពកោសល្យមានតម្លៃថោកជាងអំបិលទៅទៀត។ ព្រោះថាអ្វីដែលកាត់ផ្ដាច់គ្នារវាងបុគ្គលដែលពោរពេញដោយទេពកោសល្យ និងបុគ្គលដែលជោគជ័យ នោះគឺជាការខិតខំប្រឹងប្រែងយ៉ាងខ្លាំងក្លា"។
ប្រៀបដូចជាបុគ្គលដែលស្នងកេរ្តិ៍ពីឪពុកម្ដាយរបស់គេដែលជាត្រកូលអ្នកមានស្ដុកស្ដម្ភដូច្នោះដែរ បើសិនជាបុគ្គលនេះមានទ្រព្យច្រើនហូរហៀរហើយ តែបុគ្គលនេះមិនចេះប្រើប្រាស់ទ្រព្យធនស្រាប់ៗទាំងនោះនៅក្នុងរបៀបដែលឈ្លាសវៃ និងទទួលប្រយោជន៍ល្អប្រសើរមកវិញទេ នោះមិនយូរមិនឆាប់ ទ្រព្យដែលគេបានស្នងពីឪពុកម្ដាយ ក៏នឹងហិនហោចរលាយអស់ទៅដែរ។ ចំណែកឯបុគ្គលដែលមានការខិតខំប្រឹងប្រែងខ្ពស់ បើទោះជាមិនមានទ្រព្យធនស្រាប់ៗក៏ពិតមែន តែការខិតខំតស៊ូរបស់គេ បន្តិចម្ដងៗ តក់ៗគង់តែពេញបំពង់ និងសម្រេចបានដល់គោលដៅដូចគ្នាទេ ថ្វីបើពេលវេលាសម្រាប់ការធ្វើដំណើរផ្សងព្រេងមួយនេះ ត្រូវការរយៈពេលយូរក៏ដោយចុះ។
គ្មានអំណាចរបស់សម្ដីនរណាម្នាក់អាចកាច់បំបាក់អ្នកឲ្យទន់ខ្សោយ ឬថាអ្នកអសមត្ថភាព ឬជាជនបរាជ័យអ្វីដូចអំណាចដែលចេញមកពីការគិតរបស់អ្នកដែលមានចំពោះខ្លួនឯង និងអ្វីដែលអ្នកតែងតែប្រាប់ខ្លួនឯងនោះដែរ។ អ្វីដែលគេគិតចំពោះអ្នកគ្មានអ្វីសំខាន់សម្រាប់ភាពជោគជ័យឬបរាជ័យរបស់អ្នកនោះទេ តែអ្វីដែលសំខាន់គឺនៅត្រង់អ្វីដែលអ្នកគិតចំពោះខ្លួនឯង។ គ្មានអ្វីដែលអាចយកឈ្នះចិត្តអំណត់អត់ធ្មត់មិនព្រមរាថយនឹងឧបសគ្គរបស់អ្នកបាននោះឡើយ។
នៅពេលអ្នកមើលឃើញតម្លៃនៅក្នុងការខិតខំប្រឹងប្រែងដែលជាចម្លើយសម្រាប់នាំអ្នកទៅកាន់ជោគជ័យ នោះអ្នកនឹងមើលឃើញតម្លៃនៅក្នុងខ្លួនឯងមិនខាន។ នៅពេលកម្លាំងចិត្តខាងក្នុងរបស់អ្នករឹងមាំខ្លាំងក្លាហើយ នោះគ្មានអ្វីដែលនឹងអាចបញ្ឈប់អ្នកមិនឲ្យដល់គោលដៅដែលអ្នកចង់ទៅឲ្យដល់បាននោះឡើយ៕
ដោយ៖ ស្រីពៅ
