កាលពី​ម្សិលមិញ​យើង​បាន​ឃើញ​នាឡិកា Tag Heuer Connected Modular 41 ​ថ្មី ចំណែក​ពេល​នេះ​យើង​មាន​ព័ត៌មាន​លំអិត​អំពី Smartwatch ដើរ​ដោយ Android ​ម៉ូដែល​ផ្សេង​មួយ​ទៀត គឺ Tag Heuer Connected Full Diamond ដែល​មាន​តម្លៃ​កប់​ពពក។ Tag Heuer Connected Full Diamond ​ជា​នាឡិកា​ឆ្លាតវៃ​ដាំ​សុទ្ធតែ​ពេជ្រ មាន​តម្លៃ​រហូត​ក្បែរ ២០០០០០ដុល្លារ​ឯណោះ។

តម្លៃ​ពិត​ប្រាកដ​របស់​នាឡិកា​ដៃ​ទំនើប​របស់​ក្រុមហ៊ុន​ស្វីស​នេះ គឺ ១៩៧០០០ដុល្លារ​អាមេរិក។ វា​ជា​នាឡិកា​ត្រូវ​បាន​កែខៃ​បន្ថែម​ពី​លើ​ម៉ូដែល​ស្តង់ដារ​ Tag Heuer Connected 45 ដោយ​ត្រូវ​បាន​រចនា​ដាំ​ដោយ​គ្រាប់​ពេជ្រ​មាន​តម្លៃ​សរុប​មាន ២៣,៣៥ ការាត់ ក្នុង​នោះ​នៅ​លើ​គែម​មុខ​នាឡិកា​ដាំ​ដោយ​ពេជ្រ ៧៨គ្រាប់ នៅ​លើ​ខ្សែ​នាឡិកា​មាន ៤៩៥គ្រាប់។ អាច​និយាយ​បាន​ថា វា​ជា​នាឡិកា​តម្លៃ​កប់​ពពក​មួយ​ដែល​កម្រ​បាន​ឃើញ​កន្លង​មក។ នាឡិកា​ដាំ​ពេជ្រ​តម្លៃ​ជិត ២០ម៉ឺន​ដុល្លារ​ម៉ាក Tag Heuer នេះ បាន​បំពាក់​ដោយ​ប្រព័ន្ធ​ប្រតិបត្តិការ Android Wear 2.0 ​ហើយ​ប្រើប្រាស់​អេក្រង់ AMOLED ​និង​បំពាក់​ឈីប Atom processor, Wi-Fi, Bluetooth, NFC និង​មាន​ប្រព័ន្ធ GPS ​ទំនើប​ថែមទៀត៕   ដោយ៖ រឹទ្ធិរាជ ប្រភព៖ Tag Heuer, Droid Life, The Verge