ទើបតែសប្ដាហ៍មុនយើងបានឮដំណឹងចចាមអារ៉ាមអំពីស្មាតហ្វូន HTC ថ្មីឈ្មោះ HTC U11 EYEs ហើយពេលនេះ វាត្រូវបានសម្ពោធចេញផ្លូវការហើយ ដែលយើងនឹងបានដឹងនូវលក្ខណៈសម្បត្តិពេញលេញនៅលើស្មាតហ្វូនទំនើបកាមេរ៉ាមុខភ្លោះរបស់ក្រុមហ៊ុនតៃវ៉ាន់នេះ។
HTC U11 EYEs បានបង្ហាញខ្លួនផ្លូវការនៅលើទីផ្សារចិន និងតៃវ៉ាន់ក្នុងថ្ងៃនេះ។ វាជាស្មាតហ្វូនអេក្រង់ ៦អ៊ីញកម្រិត FHD+ (2160x1080)px ហើយមាន aspect ratio 18:9 និងក្រាលដោយកញ្ចក់ការពារ Gorilla Glass 3។ ស្មាតហ្វូនទើបចេញថ្មីនេះ ប្រើបន្ទះឈីប Qualcomm Snapdragon 652 និងមាន RAM 4GB។ វាមានអង្គចងចាំទំហំ 64GB និងមានរន្ធអាចបន្ថែម microSD បាន។
U11 EYEs ថែមទាំងបំពាក់នូវបច្ចេកវិទ្យាដែលគេកំពុងចាប់អារម្មណ៍ផងដែរ នោះគឺ Facial Recognition ប្រើសម្រាប់ដោះសោទូរស័ព្ទបានកាន់តែទំនើប។ វាមានកាមេរ៉ាមុខភ្លោះ ទំហំ 5MP ទាំងពីរគ្រាប់ ហើយខាងក្រោយទំហំ 12MP Ultrapixel camera ជាមួយ dual tone LED flash។ ស្មាតហ្វូននេះក៏មាននូវតំណភ្ជាប់សំខាន់ៗដូចជា៖ WiFi, Bluetooth 4.2 និង 4G LTE ហើយកម្លាំងថ្មរបស់វាគឺ 3930mAh រួមជាមួយស្តង់ដារការពារជ្រាបទឹក IP67 ។
ស្មាតហ្វូន HTC U11 EYEs នឹងមានលក់ក្នុងតម្លៃ ៣២៩៩យ័ន ឬប្រហែល ៥១៣ដុល្លារអាមេរិក។ មិនទាន់មានការបញ្ជាក់អំពីកាលបរិច្ឆេទដែល U11 EYEs នឹងទៅដល់ទីផ្សារអាមេរិក ឬអឺរ៉ូបនៅឡើយ៕
ដោយ៖ រឹទ្ធិរាជ
ប្រភព៖ HTC, NDTV
