Yahoo កំពុងជួបបញ្ហា ត្រូវគេរាយការណ៍ថា នឹងបន្តកាត់បន្ថយបុគ្គលិក ១០% ស្មើនឹង ១០០០នាក់នៅខែមករា ២០១៦ នេះ
ការពុះពាររបស់ Yahoo ហាក់ដូចជាមិនទាន់ស្រាកស្រាន្តនៅឡើយ។ របាយការណ៍ថ្មីនេះឱ្យដឹងថា ក្រុមហ៊ុនអ៊ីនធឺណិតនេះ មានគម្រោងកាត់បន្ថយបុគ្គលិកយ៉ាងហោច ១០% នៃបុគ្គលិកក្រុមហ៊ុន ១០០០០នាក់នៅដើមខែមករា ឆ្នាំ២០១៦នេះ។
ការកាត់បន្ថយបុគ្គលិក ធ្វើឡើងបន្ទាប់ពី Yahoo បានជួលក្រុមហ៊ុនប្រឹក្សាយោបល់ McKinsey & Co. ដើម្បីជួយធ្វើការសម្រេចចិត្ត។ ខណៈដែលការកាត់បន្ថយបុគ្គលិក ត្រូវគេរំពឹងថា នឹងប៉ះពាល់ដល់ដំណើរការលើគ្រប់ផ្នែកនៃជំនួញមេឌារបស់ Yahoo តែប្រតិបត្តិការ និងក្រុមបច្ចេកទេសលើផ្នែក platforms-technology នឹងត្រូវពង្រឹងឡើងវិញ។ ប្រភពពីគេហទំព័រ Business Insider បានរាយការណ៍ថា ក្រុមការងារមួយក្រុមរបស់ Yahoo កំពុងធ្វើកិច្ចការដើម្បីជំរុញផែនការពង្រឹងក្រុមហ៊ុនឡើងវិញនៅក្នុងត្រីមាសទី១ ឆ្នាំ២០១៦។
ចំណែកទីផ្សាររបស់ Yahoo បានធ្លាក់ចុះ ៣៥% កាលពីឆ្នាំ២០១៥ ហើយក្រុមហ៊ុនក៏បានកាត់បន្ថយបុគ្គលិករបស់ខ្លួនមួយចំនួនប្រមាណ ១៤% គឺដកពី ១២៥០០នាក់ កាលពីឆ្នាំ២០១៤។ ក្រុមហ៊ុន Yahoo បច្ចុប្បន្នមានអ្នកស្រី Marissa Mayer ជានាយកប្រតិបត្តិ ដែលអ្នកស្រីធ្លាប់ជាអតីតអនុប្រធាន Google Product Search បានឡើងកាន់កាប់ Yahoo ចាប់ពីខែកក្កដា ឆ្នាំ២០១២។
អ្នកវិនិយោគិនផ្សេងខ្លះទៀតរបស់ Yahoo បានរាយការណ៍ថា ការរៀបចំរចនាសម្ព័ន្ធថ្មីនេះ អាចមិនទាន់គ្រប់គ្រាន់ក្នុងការដឹកនាំក្រុមហ៊ុនឱ្យជោគជ័យនៅឡើយ ហើយការកាត់បន្ថយបុគ្គលិកច្រើនទៀតអាចនឹងត្រូវធ្វើបន្ត៕
