មាន​តែ​មនុស្ស​ល្ងង់​ទេ ដែល​តែងតែ​មាន​អំនួត​មក​លើ​ខ្លួនឯង​ថា​ត្រូវ​រហូត និង​មិន​ព្រម​ស្ដាប់​គំនិត​អ្នកដទៃ​ដោយ​មាន​ការ​ភ័យខ្លាច​គំនិត​របស់​ខ្លួន​ត្រូវ​បាន​គេ​ផ្ចាញ់ផ្ចាល​ឲ្យ​ខុស​ទៅ​តាម​អ្វី​ដែល​ជា​ការ​ពិត​ជាក់ស្ដែង។ ធ្វើ​ជា​អ្នកដឹកនាំ​គេ បើ​សិន​ជា​បុគ្គល​នេះ​មាន​អត្តចរិត​បែប​នោះ នោះ​បុគ្គល​នេះ​មិន​អាច​ដើរ​បាន​វែង​ឆ្ងាយ​នោះ​ឡើយ ព្រោះ​មិន​យូរ​មិន​ឆាប់​អត្តចរិត​អវិជ្ជមាន​របស់​គេ​នឹង​ទាញ​យក​មនុស្ស​ពូកែៗ​និង​ស្មោះត្រង់​ចេញ​ពី​គេ​បន្តិច​ម្ដងៗ​ដោយ​ខ្លួនឯង។ មនុស្ស​ម្នាក់ៗ​សុទ្ធតែ​មាន​សក្ដានុពល​ពិសេស​របស់​ពួកគេ​រៀងៗ​ខ្លួន ហើយ​អ្នកដឹកនាំ​ដ៏​ល្អ​នឹង​ចេះ​សម្គាល់​ឃើញ​នូវ​សក្ដានុពល​ពិសេស​ទាំងនេះ​នៅ​ក្នុង​កូនចៅ​របស់​គេ​ម្នាក់ៗ និង​ចេះ​ជំរុញ​ឲ្យ​ពួកគេ​ម្នាក់ៗ​បញ្ចេញ​នូវ​សមត្ថភាព​ពិសេស​របស់​ខ្លួន​ចេញ​មក​ប្រើ​ជា​ប្រយោជន៍។ លោក Sam Zell គឺជា​មហាសេដ្ឋី​មួយ​រូប​របស់​អាមេរិក​និង​ជា​នាយក​របស់​ក្រុមហ៊ុន Equity Group Investments បាន​លើកឡើង​នៅ​ក្នុង​សៀវភៅ​របស់​គាត់​ដែល​មាន​ចំណង​ជើង​ថា "Am I Being Too Subtle? Straight Talk From a Business Rebel" គាត់​មិន​ត្រូវការ​អ្នក​ប្រាជ្ញ​ដើម្បី​មក​ធ្វើការ​ឲ្យ​គាត់​នោះ​ទេ ព្រោះ​មាន​តម្លៃ​ជាច្រើន​ទៀត​ដែល​សំខាន់​ខ្លាំង​ជាង​កម្រិតIQ​របស់​អ្នក​ទៅ​ទៀត។ គាត់​ត្រូវការ​មនុស្ស​ដែល​ពោរពេញ​ដោយ​ជំនក់​ចិត្ត ថាមពល​ពុះ​កញ្ជ្រោល ឥរិយាបថ​និង​អត្តចរិត​ល្អ ជាពិសេស​គឺ​ចេះ​ត​ទល់​ជាមួយ​គាត់​នូវ​អ្វី​ដែល​ពួកគេ​គិត​ខុស​ពី​គាត់។ គាត់​ក៏​បាន​លើកឡើង​ថា គាត់​មិន​ចង់​បាន​បុគ្គលិក​ដែល​ចេះ​តែ​យល់ស្រប​តាម​គាត់​រហូត​នោះ​ទេ ព្រោះ​ការ​ធ្វើ​បែប​នេះ​នឹង​ស្លាប់​នៅ​ក្នុង​បរិយាកាស​នៃ​ការ​ធ្វើ​ជំនួញ។ នៅ​ពេល​បុគ្គលិក​គ្រប់​គ្នា​សុទ្ធតែ​បើក​ចំហ​និយាយ​ពី​គំនិត​របស់​ខ្លួនឯង នោះ​បរិយាកាស​បែប​នេះ​នឹង​ជំរុញ​ឲ្យ​មាន​ការ​ផ្លាស់ប្ដូរ​គំនិត​យោបល់​គ្នា​ទៅវិញ​ទៅមក ដើម្បី​ឈាន​ទៅ​ដល់​ការ​ចម្រាញ់​និង​បន្សុទ្ធ​យក​នូវ​គំនិត​និង​របៀប​ដោះស្រាយ​បញ្ហា​មួយ​ដ៏​ល្អ​ប្រសើរ​និង​ឈ្លាសវៃ​បំផុត ដែល​នេះ​គឺជា​វិធីសាស្ត្រ​ឈ្នះ​ឈ្នះ​សម្រាប់​ទាំងអស់​គ្នា​ផង​ដែរ៕ ប្រភព៖ worldecomicforum ប្រែសម្រួល៖ ស្រីពៅ