ហេតុអ្វីៗដែលកើតឡើងហួសពីការរំពឹងទុករបស់អ្នក នឹងប្រែក្លាយជាអ្វីដែលអាចផ្លាស់ប្ដូរជីវិតអ្នកឲ្យល្អប្រសើរ ?
បើអ្វីៗអាចកើតឡើងទៅតាមការរំពឹងទុកមុនរបស់យើងក្នុងគ្រប់ដំណាក់កាលទាំងអស់នៃជីវិត នោះយើងប្រាកដជារស់នៅពោរពេញដោយស្ថិរភាពក្នុងចិត្ត ក៏ព្រោះតែយើងដឹងថាអ្វីៗនឹងដើរតាមផែនការដែលយើងបានរៀបចំទុករួចជាស្រេច ហើយយើងដឹងថាត្រូវឆ្លើយតបជាមួយវាយ៉ាងដូចម្ដេច។ ប៉ុន្តែ ជីវិតដែលអ្វីៗសុទ្ធតែអាចទស្សន៍ទាយទុកជាមុនបានដូច្នេះ ប្រហែលជាជីវិតដ៏គួរឲ្យធុញទ្រាន់ហើយ។
តាមពិតទៅមានពេលខ្លះគឺជាភាពភ្ញាក់ផ្អើល ភាពមិនប្រាកដប្រជា ហេតុការណ៍ដែលស្រាប់តែលេចឡើងហួសពីការរំពឹងទុករបស់អ្នកនេះទៅវិញទេ ដែលបានកែប្រែផ្លាស់ប្ដូរជីវិតរបស់អ្នកឲ្យល្អប្រសើរ។ មនុស្សគ្រប់គ្នានរណាក៏សុទ្ធតែស្វែងរកស្ថិរភាពក្នុងជីវិតរបស់ពួកគេដែរ ព្រោះមនុស្សយើងតែងតែយល់ថាការរស់នៅជាមួយនឹងអ្វីៗដែលមិនអាចទស្សន៍ទាយទុកមុនបានដូច្នេះ គឺជារឿងដ៏គួរឲ្យភ័យខ្លាចបំផុតមួយ។
ប៉ុន្តែ នៅពេលខ្លះស្ថិរភាពនេះបានធ្វើឲ្យមនុស្សយើងមើលងាយបញ្ហាទាំងឡាយដែលអាចកើតឡើងហួសពីការរំពឹងទុករបស់ខ្លួន។ ស្ថិរភាពបានធ្វើឲ្យមនុស្សយើងឈ្លក់វង្វេងជាមួយនឹងភាពស្រណុកស្រួលក្នុងពេលបច្ចុប្បន្ន បើទោះជាពេលខ្លះផ្លូវដើរដែលពួកគេកំពុងតែដើរឆ្ពោះទៅរក គឺជាទិសដៅខុសក៏ដោយ។ ដូចលោក ប៊ីលហ្គេត ធ្លាប់និយាយថា៖ "ភាពជោគជ័យគឺជាគ្រូដ៏អាក្រក់បំផុតមួយ ព្រោះវាបានធ្វើឲ្យមនុស្សឆ្លាតឈ្លក់វង្វេងថាពួកគេនឹងគ្មានថ្ងៃអាចបរាជ័យបាននោះឡើយ"។ នៅពេលយើងជួបនឹងបញ្ហាអ្វីមួយដែលចង្អុលបង្ហាញពីភាពល្ងង់ខ្លៅរបស់យើង នោះទើបយើងចាប់ផ្ដើមសង្កេតឃើញពីជម្រៅនៃភាពឆោតល្ងង់របស់យើង ហើយចាប់ផ្ដើមខិតខំរៀនសូត្រនាំខ្លួនឯងចាកចេញពីទីងងឹតនៃភាពល្ងង់ខ្លៅនេះ។
គឺនៅត្រង់អ្វីៗស្រាប់តែលេចឡើងហួសពីអ្វីដែលអ្នកធ្លាប់គិតដល់នេះឯង ទើបវាបានផ្ដល់ឱកាសនិងបំភ្លឺដល់អ្នកឲ្យត្រួតពិនិត្យឡើងវិញពីដំណើរការណ៍នៃជីវិតរបស់អ្នក ហើយនៅពេលនេះឯងដែលជាចំណុចចាប់ផ្ដើមនៃការផ្លាស់ប្ដូរទៅរកភាពល្អប្រសើរនៃជីវិតរបស់អ្នក។ តែចុងក្រោយជាការផ្លាស់ប្ដូរទៅជាល្អឬកាន់តែអាក្រក់ជាងមុន នោះគឺអាស្រ័យទៅលើការយល់ឃើញរបស់អ្នកដែលមើលឃើញចំពោះហេតុការណ៍ដែលកើតឡើងហួសពីការរំពឹងទុករបស់អ្នកនោះទេ៕
ដោយ៖ ស្រីពៅ
