ប្រសិនបើអ្នកធ្លាប់មានអារម្មណ៍ថា ពិភពលោកមិនទាន់បានធ្វើរឿងគ្រប់គ្រាន់ដើម្បីជំរុញចលនាបដិវត្តន៍រថយន្តអគ្គិសនីដើម្បីរួមចំណែកទប់ស្កាត់នឹងការប្រែប្រួលអាកាសធាតុ ប៉ុន្តែថ្មីៗនេះ ប្រទេសចិនប្រហែលជាអាចផ្លាស់ប្ដូរគំនិតរបស់អ្នកបាន។ ទីក្រុងដ៏ពេញនិយមមួយក្នុងចំណោមទីក្រុងឯទៀតនៅក្នុងប្រទេសចិន ដែលមានចំនួនប្រជាពលរដ្ឋប្រមាណ ១១,៩លាននាក់ គឺ Shenzhen ថ្មីៗនេះ បានប្រកាសពីការសម្រេចបាននូវរថយន្តក្រុងសាធារណៈប្រមាណ ១៦៣៥៩គ្រឿង។
ទីក្រុង Shenzhen នៅពេលនេះ បានឈានដល់ចំណុចសំខាន់មុនកាលកំណត់ ដែលអាចដាក់បញ្ចេញកងរថយន្តក្រុងប្រើប្រាស់អគ្គិសនីសម្រាប់បំពេញតម្រូវការក្នុងទីក្រុង។ មន្ត្រីក្រុង Shenzhen ជឿជាក់ថា ការផ្លាស់ប្ដូរនេះ អាចជួយសន្សំសំចៃដល់ទីក្រុង ផ្ដល់មកវិញនូវថាមពលស្មើនឹង ៣៦៦.០០០ តោនធ្យូងថ្មស្តង់ដារ ខណៈអាចកាត់បន្ថយការបញ្ចេញឧស្ម័នកាបូនឌីអុកស៊ីត ១,៣៥លានតោន។ ទីក្រុង Shenzhen ក៏បានសាងសង់កន្លែងសាកភ្លើងឡានក្រុងប្រមាណ ៨០០០កន្លែង នៅទូទាំងស្ថានីយសាកភ្លើង ៥១០ស្ថានីយទូទាំងទីក្រុង។
យោងតាមរបាយការណ៍ក្រុមហ៊ុន Fast Company មួយបានឱ្យដឹងថា រថយន្តក្រុងថ្មី របស់ក្រុង Shenzhen ជាង ៨០% ត្រូវបានផលិតដោយក្រុមហ៊ុនតែមួយគឺ BYD (Build Yours Dreams)។ ខណៈ Tesla បានក្លាយទៅជាក្រុមហ៊ុនផលិតរថយន្តអគ្គិសនីធំបំផុតនៅលើពិភពលោក ដូច្នេះការអភិវឌ្ឍរថយន្តក្រុងអគ្គិសនីនៅក្រុង Shenzhen នេះ មិនមានអ្វីត្រូវភ្ញាក់ផ្អើលនោះទេ ដែលបានជ្រើសរើសដើម្បីទាញយកអត្ថប្រយោជន៍ពីសេវាកម្មរបស់ខ្លួន។
បច្ចុប្បន្ននេះទីក្រុង Shenzhen មានរថយន្តតាក់ស៊ីប្រមាណ ៦២,៥% (១២៥១៨ គ្រឿង) គឺដំណើរការដោយថាមពលអគ្គិសនី ប៉ុន្តែមន្ត្រីរដ្ឋាភិបាលមានគម្រោងបង្កើនបរិមាណឱ្យកើនឡើង ១០០% ថែមទៀតនៅឆ្នាំ២០២០ ខាងមុខ។ នេះជាផែនការដ៏មានមហិច្ឆតា ដែលប្រធានផ្នែកដឹកជញ្ជូនសាធារណៈលោក Zheng Jingyu ហាក់មានទំនុកចិត្តយ៉ាងខ្លាំង។
លោក Jingyu បានឱ្យដឹងក្នុងសេចក្ដីថ្លែងការណ៍មួយថា៖ “យើងនឹងផ្លាស់ប្ដូររថយន្តតាក់ស៊ីឥន្ធនៈ ដែលមានស្រាប់ជាមួយនឹងថាមពលអគ្គិសនីហើយបញ្ចប់គោលដៅនៅឆ្នាំ២០២០ ឬអាចមុនពេលកំណត់ក៏ថាបាន”៕
ដោយ៖ រឹទ្ធិរាជ
ប្រភព៖ techspot
