Benjamin Franklin បិតាស្ថាបនិកអាមេរិក៖ «វិនិយោគលើចំណេះដឹង នឹងផ្ដល់ផលចំណេញធំធេងបំផុត»
«វិនិយោគលើចំណេះដឹង នឹងផ្ដល់ផលចំណេញធំធេងបំផុត»។ នេះជាពំនោលរបស់លោក Benjamin Franklinដែលគេស្គាល់ថា បិតាស្ថាបនិកអាមេរិក និង ជាវីរបុរសដ៏សំខាន់ក្នុងប្រវត្តិសាស្ត្ររបស់អាមេរិក ក្នុងការជួយតាក់តែង និង រៀបចំរដ្ឋធម្មនុញ្ញ។
ក្នុងន័យនេះ លោកចង់ផ្ដល់តម្លៃយ៉ាងសំខាន់លើចំណេះដឹង ហើយបើវិនិយោគលើវាហើយ នោះគ្មានថ្ងៃណាដែលខាតនោះទេ។ បើវិនិយោគលើ អាជីវកម្មណាមួយ វាអាចខាត ឬ ចំណេញ ប៉ុន្តែបើវិនិយោគលើចំណេះដឹងវិញ គឺគ្មានថ្ងៃណាខាតនោះឡើយ ព្រោះរាល់ការចំណាយ រាប់ទាំងលុយ ពេលវេលា និង ការតាំងចិត្តនោះ នឹងទទួលបានផលទៅថ្ងៃខាងមុខ។
មនុស្សមិនអាចជោគជ័យនោះឡើយ ប្រសិនបើគ្មានចំណេះដឹងព្រោះមុនពេលមនុស្សអាចធ្វើកិច្ចការណាមួយបានយ៉ាងមានប្រសិទ្ធភាពនោះ វាទាមទារឲ្យពួកគេត្រូវមានចំណេះដឹងជាមុនសិន។ ដោយសារតែបែបនេះហើយបានជា មានមនុស្សជាច្រើនខិតខំយ៉ាងខ្លាំងដើម្បីវិនិយោគលើចំណេះដឹងនេះ ព្រោះកាលណាមានចំណេះដឹងហើយ នោះពួកគេនឹងដឹងច្បាស់អំពីវិធីដែលជួយឲ្យខ្លួនឯងអាចដើរឆ្ពោះទៅមុខយ៉ាងជោគជ័យ។
ដូច្នេះហើយ មិនថាអ្នកមានជីវភាពក្រីក្រ ឬ យ៉ាងណានោះទេ ត្រូវតែព្យាយាមវិនិយោគលើចំណេះដឹងឲ្យបានកាន់តែច្រើនតាមតែអាចធ្វើទៅបាន។ អ្នកអាចនឹងក្រ ឬ ក្រដល់កូនដល់ចៅទៀត ប្រសិនបើអ្នកគ្មានចំណេះដឹង។ អ្នកអាចនឹងក្រក្នុងពេលបច្ចុប្បន្ន ដោយសារតែជីវភាពក្រីក្រ ហើយប្រឹងបែងចែកលុយមួយភាគធំ ដើម្បីចំណេះដឹង តែលុយទាំងនោះនឹងត្រលប់មកកាន់អ្នកវិញ លើសពីមុនច្រើនដង ហើយកូនចៅរបស់អ្នកក៏ស្គាល់ពន្លឺជីវិតផងដែរ៕
