វា​ជា​ការ​ពិត​ទៅ​ហើយ ដែល Samsung Galaxy 8 អាច​ធ្វើ​បាន គឺ​អន្ទង​ចិត្ត​អតិថិជន​បាន​ចំនួន​ដ៏​ច្រើន គ្រាន់តែ​គិត​ក្នុង​រយៈពេល​ដាក់​ឱ្យ​បញ្ជា​ទិញ Pre-Order ថ្ងៃ​ទី១ គឺ​ដាច់​អស់​​ដល់​ទៅ ៤០ម៉ឺន​គ្រឿង​ឯណោះ។ ​នេះ​គឺ​គិតតែ​នៅ​លើ​ទីផ្សារ​ប្រទេស​កូរ៉េ​ដែល​ជា​ទឹកដី​កំណើត​របស់​ខ្លួន​ប៉ុណ្ណោះ Samsung អាច​ច្បាម​អ្នក​​គាំទ្រ​កុម្ម៉ង់​ចំនួន​ប្រហែល 400,000 គ្រឿង​ទៅ​ហើយ ដែល​គិត​ត្រឹម​ថ្ងៃ​ដាក់​ឱ្យ​បញ្ជា​ទិញ​ថ្ងៃ​ទី១។

ក្រុមហ៊ុន អាច​គ្រប់គ្រង​ការ​បញ្ជា​ទិញ​ពី​អតិថិជន​នូវ​ទូរស័ព្ទ​ Galaxy Note 8 ​រហូត​ដល់​ចំនួន 395,000 ឯណោះ គិត​ត្រឹម​ថ្ងៃ​ដំបូង ដែល​វា​ខ្ពស់​ជាង​តែ​បន្តិច​ប៉ុណ្ណោះ​ប្រៀបធៀប​នឹង Galaxy Note 7 ​កាលពី​ឆ្នាំ​ទៅ ដែល​ធ្វើ​បាន 380,000។ យ៉ាងណា វា​មិនមែន​ជា​រឿង​អាក្រក់​នោះ​ឡើយ។

យោងតាម​ក្រុមហ៊ុន Samsung ផ្ទាល់​ថា Note 8 ម៉ូដែល 64GB ​ហាក់​ទទួល​បាន​ប្រជាប្រិយភាព​ខ្លាំង​ជាង​គេ ក្នុង​ចំណោម​តួលេខ​បញ្ជា​ទិញ​ថ្ងៃ​ដំបូង​ខាង​លើ គឺ​ក្ដាប់​បាន ៦៥%។ វា​មិន​មាន​អ្វី​គួរ​ភ្ញាក់ផ្អើល​នោះ​ទេ ដែល Note 8 ពណ៌​ Blue និង Black ​លក់​ដាច់​បំផុត រៀង​គ្នា។ សំណួរ​មួយ​សួរ​ថា តើ​ចំពោះ​ទីផ្សារ​ពិភពលោក​វិញ Samsung នឹង​ធ្វើ​បាន​ល្អ​កម្រិត​ណា ជាមួយ​វត្តមាន Note 8? គេ​ជឿ​ថា Galaxy Note 8 អាច​ជា​អាវុធ​ខ្លាំង​សម្រាប់ Samsung រក​ប្រាក់​ចំណូល​ចូល​ក្រុមហ៊ុន​ក្នុង​ឆ្នាំ២០១៧ នេះ ក៏​ដូច​ជា​រួម​ចំណែក​សម្រាប់​ឆ្នាំ​២០១៨ ខាង​មុខ ខណៈ​វត្តមាន Galaxy S9 ក៏​នឹង​ត្រៀម​នៅ​ដើម​ឆ្នាំ​ក្រោយ​ផង​ដែរ៕ ​ដោយ៖ រឹទ្ធិរាជ ប្រភព៖ Ubergizmo