ក្រុមហ៊ុន Daimler AG ថ្មីៗនេះបានបង្ហាញគំរូកូនរថយន្តអគ្គិសនីថ្មីសន្លាង ដែលមានរូបរាងឌីហ្សាញស្អាតប្លែកភ្នែក ជាមួយមហិច្ឆតា ត្រៀមនឹងបំពាក់បច្ចេកវិទ្យាទំនើបបើកបរដោយស្វ័យប្រវត្តិថែមទៀត។ គំរូរថយន្តថ្មីរបស់ក្រុមហ៊ុន អាល្លឺម៉ង់នេះត្រូវបានហៅឈ្មោះថា Smart Vision EQ ForTwo ដែលនឹងត្រូវនាំយកទៅតាំងបង្ហាញក្នុងពិព័រណ៍ Frankfurt Motor ខែក្រោយ។
Smart Vision EQ ForTwo នឹងជារថយន្តអគ្គិសនីបើកបរស្វ័យប្រវត្តិ ហើយរថយន្តត្រូវបានឌីហ្សាញផ្ដោតលើភាពឆ្លាតវៃ សម្រាប់បំពេញតម្រូវការអ្នកប្រើនាពេលអនាគត។ វានឹងផ្ដល់បទពិសោធន៍ថ្មីក្នុងវិស័យដឹកជញ្ជូន ពោលគឺផ្ដល់អារម្មណ៍ផាសុកភាពដល់អ្នកប្រើ ទាំងដំណើរការដោយអគ្គិសនី ចូលរួមកាត់បន្ថយការសាយភាយឧស្ម័នពុលទៅក្នុងបរិយាកាស ក៏ដូចអាចឱ្យអ្នកជិះ សម្រាកលំហែ ដោយគ្មានការព្រួយបារម្ភពីរឿង ត្រូវកាន់ដៃចង្កូតទៀតឡើយ ព្រោះនឹងបំពាក់បច្ចេកវិទ្យា Self-Driving។
ក្រៅពី Smart Vision EQ ForTwo ហើយនោះ គេនឹងឃើញរថយន្តអគ្គិសនីជាច្រើនស៊េរី ត្រូវតាំងបង្ហាញក្នុងពិព័រណ៍ Frankfurt Motor ខាងមុខ ដែលក្នុងនោះក៏នឹងមានវត្តមានស៊េរីគំរូរថយន្ត Mercedes-Benz សម្រាប់អនាគតនៅឆ្នាំ២០២២ ផងដែរ ដែលជារថយន្តធុនធំប្រភេទ SUV៕
ប្រែសម្រួល៖ រឹទ្ធិរាជ
ប្រភព៖ businessinsider
