លោក Jay Y. Lee អនុប្រធានក្រុមហ៊ុន Samsung ប្ដឹងជំទាស់ការកាត់ទោសរូបលោកឲ្យជាប់ពន្ធនាគារ ៥ឆ្នាំ
លោក Jay Y.Lee អនុប្រធានក្រុមហ៊ុនអេឡិចត្រូនិក Samsung (Samsung Electronics) បានដាក់ពាក្យបណ្ដឹងជំទាស់ទៅនឹងការកាត់ទោសរូបលោកឲ្យជាប់ពន្ធនាគាររយៈពេល ៥ឆ្នាំ ពីបទសូកប៉ាន់ និងការចោទប្រកាន់ផ្សេងៗតាមរយៈមេធាវីរបស់លោក។ នេះបើយោងតាមការបញ្ចេញឱ្យដឹងពីគេហទំព័រតុលាការនៅទីក្រុងសេអ៊ូល (Seoul Central District Court) កាលពីថ្ងៃច័ន្ទ។
ការកាត់ទោសទៅលើមហាសេដ្ឋីប្រាក់ពាន់លានរូបនេះធ្វើឲ្យមានការភ្ងាក់ផ្អើល និងរង្គោះរង្គើដល់ស្ងានភាពសេដ្ឋកិច្ចរបស់ប្រទេសកូរ៉េខាងត្បូងដែលធ្លាប់តែស្ថិតស្ថេរច្រើនឆ្នាំមកហើយ។ សូមបញ្ជាក់ថា ប្រាក់ចំណូលសរុបរបស់ក្រុមហ៊ុន Samsung មួយប្រហែលស្មើនឹង ២០%នៃចំណូលក្នុងស្រុកសរុបរបស់ប្រទេសនេះ។
មេធាវីរបស់លោក Jay Y.Lee បានព្យាយាមទប់ស្កាត់ការសាកសួរពីសំណាក់ប្រព័ន្ធផ្សព្វផ្សាយ ខណៈអ្នកនាំពាក្យរបស់ Samsung មិនមានការឆ្លើយតបភ្លាមៗជុំវិញបណ្ដឹងមួយនេះឡើយ។
បច្ចុប្បន្ន លោក Lee មានអាយុ 49ឆ្នាំ ជាអ្នកទទួលមរតកពីក្រុមហ៊ុនសាជីវកម្មដ៏ធំមួយនេះ ត្រូវបានឃាត់ខ្លួនកាលពីខែកុម្ភៈ ដោយការចោទប្រកាន់ថាលោកបានសូកប៉ាន់ អតីតប្រធានាធិបតេយ្យលោកស្រី Park Geun-hye ដើម្បីជួយឲ្យរូបលោកគ្រប់គ្រងក្រុមហ៊ុនដ៏ធំមួយនេះ ដែលកាន់កាប់ ក្រុមហ៊ុនអេឡិចត្រូនិក Samsung (Samsung Electronics) ដែលជាអ្នកផលិតទូរស័ព្ទស្មាតហ្វូន Chip និងផលិតផលអេឡិចត្រូនិកសម្រាប់ប្រើប្រាស់ក្នុងផ្ទះនាំមុខគេមួយក្នុងលោក។
លោក Lee អាចនឹងត្រូវឃុំខ្លួនរយៈពេល ៤ខែ កំឡុងពេលដែលតុលាការកំពុងពិចារណាលើការប្ដឹងជំទាស់នេះ។ សាលាឧទ្ធរណ៍នឹងបញ្ចប់សំណុំរឿងនេះ នៅខែមករា ឆ្នាំ២០១៨ នេះបើតាមមេធាវីការពារក្ដីរបស់លោក។
លោក Kwon Oh-hyun នាយកប្រតិបត្តិក្នុងក្រុមហ៊ុននេះ បានសុំឲ្យបុគ្គលិកក្នុងក្រុមហ៊ុនខិតខំប្រឹងប្រែងធ្វើការជួយក្រុមហ៊ុន។ នេះបើតាមសាររបស់លោកដែលបានផ្ញើរទៅកាន់បុគ្គលិកកាលពីថ្ងៃច័ន្ទ៖ «អ្នកទាំងអស់គ្នាប្រាកដជាមានអារម្មណ៍តក់ស្លុតដោយសារតែច្បាប់របស់តុលាការ ហើយយើងដែលជាថ្នាក់ដឹកនាំក៏មានអារម្មណ៍ក្រៀមក្រំដែរ»។ «សូមអ្នកទាំងអស់គ្នាខិតខំឲ្យអស់ពីកម្លាំងកាយចិត្ត ពួកយើងជាថ្នាក់ដឹកនាំនឹងស្វែងរកវីធីយ៉ាងណាដើម្បីដោះស្រាយបញ្ហានេះឲ្យទាល់តែបាន»។
ភាគហ៊ុនរបស់ក្រុមហ៊ុនអេឡិចត្រូនិក Samsung (Samsung Electronics) បានធ្លាក់ចុះប្រមាណ 2% បើធៀបនឹងការធ្លាក់ចុះ 0.35% នៅ Kospi ខណះដែលភាគហ៊ុនរបស់ក្រុមហ៊ុន ដែលកាន់កាប់ក្រុមហ៊ុន Samsung C&T ធ្លាក់ចុះប្រមាណ 3.4% និងក្រុមហ៊ុន Samsung Life Insurance ធ្លាក់ចុះ 2.9% បន្ទាប់ពីការកាត់ទោសកាលពីថ្ងៃសុក្រ នេះបើតាមអ្នកវិភាគ។
របាយការណ៍ពី S&P ជាក្រុមហ៊ុនទីផ្សារភាគហ៊ុនអាមេរិក និង Fitch ជាភ្ងាក់ងារវាយតម្លៃឥណទាន កាលពីសប្ដាហ៍កន្លងទៅ មានការព្រួយបារម្មណ៍អំពីអ្នកវិនិយោគទុនក្រៅប្រទេស ដោយសារតែពួកគេដកភាគហ៊ុននៅថ្ងៃនេះច្រើនជាងកាលពីថ្ងៃសុក្រ នេះបើតាមលោក Kim Ye-eun អ្នកវិភាគទីផ្សារភាគហ៊ុនរបស់ Cape Investment & Securities ។
ក្រុមហ៊ុនអេឡិចត្រូនិក Samsung (Samsung Electronics) បានថ្លែងថាលោក Lee នៅតែមានមុខងារជាសមាជិកក្រុមប្រឹក្សានាយកដដែល លុះត្រាតែមានការសម្រេចថាមានទោសពិតមែន។
ក្រុមហ៊ុន Samsung ទំនងជាជំទាស់នឹងការសម្រេចរបស់តុលាការថ្នាក់ក្រោម ដែលថាការផ្ដល់លុយទៅដល់មនុស្សដែលលោកស្រី Park Geun-hye ទុកចិត្ត គឺលោកស្រី Choi Soon-sil ថាដូចទៅនឹងលោកស្រី Park Geun-hye ទទួលលុយដោយផ្ទាល់។
Samsung ទំនងជាចង់ការពារលោក Lee ថាមិនមានកំហុស ដោយថាការទទួលយកលុយរបស់លោកស្រី Choi Soon-sil ថាមិនដូចការសូកលុយផ្ទាល់ទៅកាន់លោកស្រី Park Geun-hye នេះបើតាមលោកមេធាវី Byun Hwan-bong។
ប្រសិនបើការប្រឆាំងនោះទទួលបានជោគជ័យមែននោះ វាជាឱកាសដែលការកាត់ទោសអាចនឹងត្រូវបន្ថយឱ្យមកនៅត្រឹមតែ ៣ឆ្នាំឬតិចជាងនេះ និងអាចទទួលបានសិទ្ធិព្យួរទោស ដែលអនុញ្ញាតឲ្យមានការដោះលែង នេះបើតាមសម្ដីរបស់មេធាវី។
គួរបញ្ជាក់ផងដែរថា លោក Leeបានចាប់ផ្តើមធ្វើការនៅ Samsung នៅឆ្នាំ១៩៩១។ ក្រោយមក លោកបានចាប់ផ្តើមបម្រើការងារជាអនុប្រធានផែនការយុទ្ធសាស្ត្រ ហើយក្រោយមកបានក្លាយជា “ប្រធានផ្នែកបម្រើសេវាកម្មអតិថិជន” (Chief Customer Officer) ដែលជាមុខតំណែងមួយត្រូវបានបង្កើតឡើងសម្រាប់តែរូបលោកប៉ុណ្ណោះ។ លោក គឺជាកូនប្រុសច្បងនិងជាកូនប្រុសតែម្នាក់គត់របស់លោក Lee Kun-hee ប្រធានក្រុមហ៊ុន Samsung Group ហើយត្រូវគេចាត់ទុកថាជាអ្នកស្នងតំណែងឪពុករបស់លោកនាពេលអនាគត៕
ដោយ៖ លង់ វណ្ណៈ
