iPhone ថ្មីដែលត្រូវរំពឹងថា នឹងមានការឌីហ្សាញថ្មីខុសប្លែកជំនាន់មុនៗ បើតាមសេចក្ដីរាយការណ៍ម្សិលមិញនេះ ថានឹងត្រូវក្រុមហ៊ុន Apple ប្រកាសផ្លូវការនៅថ្ងៃ១២ កញ្ញាក្រោយនេះ។ ចំណែកសេចក្ដីរាយការណ៍ថ្ងៃនេះ ឱ្យដឹងដោយគេហទំព័រ New York Times លើកឡើងថា iPhone ថ្មីដែលនឹងរចនា ភ្ជាប់គែមអេក្រង់ស្ដើងស្អាតទាន់សម័យ នឹងមានលក់ក្នុងតម្លៃចាប់ពី ៩៩៩ដុល្លារ គឺថ្លៃជាងម៉ូដែលលក្ខណៈ សម្បត្តិដំបូង (standard iPhone) សព្វថ្ងៃ ប្រហែល ៣៥០ដុល្លារឯណោះ។
នាខែកញ្ញាក្រោយនេះ ក្រុមហ៊ុន Apple ត្រូវគេរំពឹងថា នឹងសម្ពោធផ្លូវការទូរស័ព្ទ iPhone ជំនាន់ថ្មី អាចមានដល់ទៅ ៣ម៉ូដែល ប្រកាសដំណាលគ្នា ក្រៅពី iPhone 8 ក៏អាចមាននូវម៉ូដែលអាប់ដេតពី iPhone 7 និង 7 Plus នោះគឺ iPhone 7s និង iPhone 7s Plus ដែលមានលក្ខណៈសម្បត្តិខ្ពស់ជាងមុន។
ប្រភពព័ត៌មាន New York Times ដដែលថែមទាំងបានអះអាងទៀតថា iPhone ស៊េរីថ្មីនឹងរួមបញ្ចូលនូវបច្ចេកវិទ្យាសាកថ្មឥតខ្សែ (wireless charging) និងមុខងារសម្គាល់ផ្ទៃមុខសម្រាប់ប្រព័ន្ធសុវត្ថិភាព ឬអាចប្រើសម្រាប់ដោះសោទូរស័ព្ទក៏បាន។ បើតាមការបែកធ្លាយលក្ខណៈសម្បត្តិខ្លះៗ តាមរយៈ firmware ដែល Apple បង្ហើបដោយចៃដន្យកាលពីខែមុន ហាក់បង្ហាញឱ្យដឹងថា ក្រៅពីមាន Facial Recognition ហើយ អេក្រង់ iPhone ជំនាន់ថ្មីក៏នឹងត្រូវបង្កើនកម្រិត resolution ខ្ពស់ជាងមុនផងដែរ ហើយប៊ូតុង Home ក៏អាចត្រូវលាក់ជិត អាចបង្កប់នៅក្រោមកញ្ចក់អេក្រង់ ឬមួយនៅផ្នែកខាងខ្នងក៏ថាបាន៕
ប្រែសម្រួល៖ រឹទ្ធិរាជ
ប្រភព៖ theverge
