បើថ្លៃបណ្ណាការថ្លៃម្លឹងៗ ហើយប្រាក់ខែតិច បងប្អូនប្រុសៗគួរគិតនាំគ្នាសន្សំលុយតាមវិធីនេះវិញម្ដង!
ថ្លៃបណ្ណាការ ឬដែលហៅតាមភាសាសាមញ្ញថា ថ្លៃទឹកដោះនោះត្រូវបានគេកត់សម្គាល់ឃើញថា មានតម្លៃថ្លៃទៅតាមបណ្ដាខេត្ត ឬតំបន់ ហើយបើនិយាយពីនៅទីក្រុងវិញ គឺមានតម្លៃខ្ពស់មែនទែនចាប់ពីខ្ទង់ពាន់ដុល្លាររហូតដល់ម៉ឺនដុល្លារ។ ប្រការនេះហើយដែលជារបាំងមួយសម្រាប់បងប្អូនប្រុសៗ ឬគូស្នេហ៍ ដើម្បីរៀបចំកម្មវិធីអាពាហ៍ពិពាហ៍ ដូច្នោះត្រូវតែចេះសន្សំលុយ ដែលជាវិធីតែមួយគត់អាចសម្រេចក្ដីបំណងនៃការរៀបអាពាហ៍ពិពាហ៍របស់លោកអ្នកបាន។ តើយើងគួរគិតសន្សំបែបណាវិញ ទើបអាចសម្រេចទៅបាន?
លោក ហ៊ាន ម៉េងហុង នាយកប្រតិបត្តិសន្សំ និងសេវាកម្មនៃគ្រឹះស្ថានមីក្រូហិរញ្ញវត្ថុ AMK បានលើឡើងដូច្នេះថា រឿងពិតមួយដែលយុវជន ក៏ដូចជាបងប្អូនភាគច្រើនគួរតែចាប់ផ្ដើមគិត និងធ្វើ គឺការសន្សំប្រាក់ ហើយការសន្សំអាចធ្វើទៅបានដោយជោគជ័យគឺមិនមែនសន្សំទុកដោយខ្លួន ប៉ុន្តែគួរគិតពីការសន្សំជាមួយគ្រឹះស្ថានហិរញ្ញវត្ថុវិញព្រោះថាអាចទទួលបានការប្រាក់ មានសុវត្ថិភាព និងទទួលបានអត្ថប្រយោជន៍មួយចំនួនថែមទៀតផង។ លោកបានបន្តថា ការសន្សំនេះ មិនមែនសម្រាប់តែការរៀបអាពាហ៍ពិពាហ៍ប៉ុណ្ណោះទេ ប៉ុន្តែមានប្រយោជន៍ សម្រាប់បម្រើបម្រាស់លើមុខចំណាយចាំបាច់ជាច្រើនទៀតសម្រាប់ពេលអនាគត។ ពាក់ព័ន្ធនឹងប្រធានបទនៃការរៀបអាពាហ៍ពិពាហ៍វិញ អ្នកជំនាញរូបនេះ បានលើកឡើងថា ដើម្បីសន្សំសម្រាប់រៀបចំកម្មវិធីអាពាហ៍ពិពាហ៍ឬសម្រាប់ចំណាយទៅលើថ្លៃបណ្ណាការទៅបាន លុះត្រាភាគីទាំងពីរមានផែនការច្បាស់លាស់ទុកជាមុនសិន។ លោកបានឧទាហរណ៍ដូច្នេះថា ៖«យើងត្រូវកំណត់ថា តើយើងគួររៀបការនៅពេលណា? គ្រោងចំណាយប៉ុន្មានដែរ? ចំណាយទៅលើអ្វីខ្លះ? ហើយគួរចាប់ផ្ដើមសន្សំពីចំនួនប៉ុន្មានក្នុងមួយខែឡើងទៅដើម្បីសម្រេចបាន?»។ លោក ម៉េងហុង បន្តថា ត្រូវតែធ្វើផែនការឱ្យបានច្បាស់លាស់ជាមុនសិន ទើបអាចសន្សំបានដោយជោគជ័យ។ អ្នកជំនាញដដែលរូបនេះ បានលើកឡើងបន្តទៀតថា គ្រឹះស្ថានមីក្រូហិរញ្ញវត្ថុមួយចំនួនបានបង្កើតផលិតផលសន្សំសម្រាប់ប្រើប្រាស់នាពេលអនាគត ដូចជា AMK ជាដើម បានបង្កើតផលិតផលមួយដែរមានឈ្មោះថា គណនីសម្រាប់អនាគត (Future Account)។ សម្រាប់គ្រឹះស្ថានមីក្រូហិរញ្ញវត្ថុ AMK គណនីប្រភេទនេះគឺបាននិងកំពុងទទួលបានការចាប់អារម្មណ៍ពីអ្នកធ្វើការមួយចំនួនធំ ហើយអ្វីដែលពិសេសសម្រាប់គ្រឹះស្ថានរបស់លោកនោះគឺផលិតផលនេះមានលក្ខណៈអំណោយផលដល់អតិថិជន ពោលគឺអតិថិជន អាចសន្សំចាប់ពីចំនួនតិចបំផុតគឺ ៥ដុល្លារក្នុងមួយខែឡើងទៅ ហើយក្រៅពីទទួលបានការប្រាក់ អតិថិជនថែមទាំងទទួលបានការបន្ថែមជូនសេវាកម្មធានារ៉ាប់រងទៀតផង។ លោក ម៉េងហុង មានប្រសាសន៍ថា អ្នកដែលមានប្រាក់ខែ ជាពិសេសអ្នកមានប្រាក់ខែតិចនេះហើយ គួរគិតពីការសន្សំប្រចាំខែ ព្រោះមានតែធ្វើរបៀបនេះទេទើបយើងអាច សម្រេចក្ដីប្រាថ្នានៃការរៀបអាពាហ៍ពិពាហ៍របស់យើងបាន។ លោក មានប្រសាសន៍ដូច្នេះ ៖«សម្រាប់អ្នកមានផែនការ គួរគិតពីការសន្សំនៅគណនីអនាគត ព្រោះថា បើសន្សំនៅគណនីមានការកំណត់ (Fix Deposit) ជាដើម គឺត្រូវការលុយធំ ហើយប្រសិនយើងមានលុយធំបែបនេះ គឺមិនចាំបាច់សន្សំប្រចាំខែនោះទេ»។ លោក ម៉េងហុង បានផ្ដល់អនុសាសន៍ មួយទៀតថា ចំពោះអ្នកចង់សន្សំលុយ កុំចាយលុយហើយសល់ប៉ុន្មានចាំយកមកសន្សំ ប៉ុន្តែត្រូវតែបែងចែកយកមកសន្សំចំនួនប៉ុន្មានសិន ចាំសល់ប៉ុន្មានចាំយកទៅចាយ។ ការសន្សំមិនមែនសម្រាប់តែបុរសៗនោះ ប៉ុន្តែខាងស្រីក៏គួរតែសន្សំដែរ៕
