លោកRobert Kiyosaki ៖ បើមានចំណុចទាំងនេះ មានន័យថា អ្នកគ្មាននិស្ស័យរកស៊ីតាំងពីកំណើត
Robert Kiyosaki អ្នកនិពន្ធសៀវភៅ «ឪពុកអ្នកមានបង្រៀនកូនអ្នកក្រ» បានលើកឡើងថា មិនមែនមនុស្សគ្រប់គ្នាសុទ្ធតែអាចធ្វើជាអ្នកជំនួញ ឬអ្នករកស៊ីជោគជ័យបាននោះទេ។ អ្នកនិពន្ធរូបនេះអះអាងថា មានបើមានចំណុច៥យ៉ាងនេះ មានន័យថា អ្នកមិនសមជាអ្នករកស៊ីឡើយ៖
១) គ្មានជំហររឹងមាំលើខ្លួនឯង
នៅពេលចាប់ផ្ដើមអាជីវកម្មមួយ ប្រាកដណាស់ថា នឹងមានគំនិតប្រឆាំង និង ការរិះគន់ជាច្រើនពីអ្នកជុំវិញខ្លួន រាប់ចាប់តាំងពីប្រពន្ធ ឬ ប្ដី ឪពុកម្ដាយ និង មិត្តភ័ក្ដិជាដើម។ ត្រង់ចំណុចនេះ អ្នកត្រូវតែមានភាពក្លាហានក្នុងការស្ដាប់គំនិតអ្នកទាំងនោះ ហើយក៏ត្រូវមានភាពក្លាហានក្នុងការបន្តដំណើរទៅមុខ ដោយផ្អែកលើគំនិតដែលអ្នកគិតថា ត្រឹមត្រូវដែរ។ ប្រសិនបើ អ្នកគ្មានជំហររឹងមាំលើខ្លួនឯងទេ នោះអាជីវកម្មរបស់អ្នកនឹងត្រូវរលាយមិនខាន ព្រោះនឹងត្រូវផ្លាស់ប្ដូរទៅតាមគំនិតរបស់អ្នកទាំងនោះ។
២) អ្នកមិនចូលចិត្តមានទំនាក់ទំនងច្រើន៖
អាជីវកម្មមួយអាចជោគជ័យបានគឺមានកត្តាច្រើនណាស់ ប៉ុន្តែចំណុចសំខាន់មួយដែលមិនអាចខ្វះបាននោះ គឺស្គាល់គេច្រើន ឬ មានទំនាក់ទំនងច្រើនជាមួយម្ចាស់អាជីវកម្ម ឬអ្នកបម្រើការងារដែលពាក់ព័ន្ធនឹងអាជីវកម្មរបស់អ្នក។ ដូច្នេះ ហើយត្រូវប្រាកដក្នុងចិត្តថា អ្នកអាចដើរចេញក្រៅដើម្បីជួបមនុស្សថ្មីៗ និង សាងទំនាក់ទំនងជាមួយអ្នកទាំងនោះបាន បើមិនដូច្នោះទេ មិនបាច់ចេញរកស៊ីទេ។
៣) អ្នកត្រូវការពាក្យសរសើរចំពោះការខិតខំរបស់អ្នក
ទោះអ្នកដទៃសរសើរ ឬ មិនសរសើរចំពោះការខិតខំប្រឹងប្រែងរបស់អ្នក គឺមិនមែនជារឿងសំខាន់ខ្លាំងពេកទេ ក្នុងការធ្វើអាជីវកម្ម តែអ្វីដែលសំខាន់បំផុតនោះ អ្នកនៅតែមានឆន្ទៈ និង ស្មារតីមោះមុតក្នុងការបន្តដំណើរដ៏វែងឆ្ងាយទៅមុខទៀត។ តែបើអ្នករង់ចាំពាក្យសរសើរពីអ្នកដទៃចំពោះ ការខិតខំប្រឹងប្រែងរបស់អ្នកនោះ អាចនិយាយបានថា អ្នកជាមនុស្សដែលមិនសមនឹងការធ្វើអាជីវកម្មនោះឡើយ។
៤) អ្នកត្រូវការអ្នកដទៃដើម្បីលើកទឹកចិត្ត
ត្រូវចាំថាការធ្វើអាជីវកម្មគឺ ពិតជាលំបាកខ្លាំងណាស់ ហើយបើអ្នកចាំតែអ្នកដទៃមកលើកទឹកចិត្តនោះ គឺប្រាកដជាទៅមិនរួចទេ ទាល់តែអ្នកជាមនុស្សតែ តស៊ូ ហើយពូកែលើកទឹកចិត្តខ្លួនឯង ដើម្បីបន្តដំណើរការនៃអាជីវកម្មនោះទៀត។
៥) ចូលចិត្តធ្វើអ្វីតែមួយមុខ៖
ក្នុងនាមជាអ្នកជំនួញ គឺមានរឿងច្រើនណាស់ដែលត្រូវធ្វើ និង ត្រូវដោះស្រាយ ដូច្នេះហើយវាទាមទារឲ្យមានភាពអត់ធ្មត់ក្នុងការធ្វើរឿងទាំងនោះ។ ប៉ុន្តែបើអ្នកជាមនុស្សដែលមិនចូលចិត្តការងារច្រើនមុខនោះ មានន័យថា អ្នកមិនសមជាសហគ្រិននោះឡើយ៕
ដោយ៖ រតនា វិចិត្រ
