លោក ឌិន សុមេធារិទ្ធអ្នកជំនួញផ្នែកសណ្ឋាគារ ៖ បើមិនចង់វ័ណ្ឌកទេ ពេលចេញរកស៊ីដំបូងត្រូវគិតដល់រឿងខាតផង
លោក ឌិន សុមេធារិទ្ធ ជាអគ្គនាយកក្រុមហ៊ុន Frangipani Villa បានលើកឡើងថា មនុស្សភាគច្រើនពេលចាប់ផ្ដើមរកស៊ី គឺគិតតែរឿងចំណេញ តែមិនដែលគិតដល់រឿងខាតនោះទេ ហើយនៅពេលបញ្ហាកើតឡើង គឺ អាជីវកម្មប្រាកដជាងាយនឹងដួលរលំ។
ការអះអាងបែបនេះគឺធ្វើឡើងនៅក្នុងកម្មវិធី «ស្វែងយល់ពីបញ្ហាប្រឈមនៃធុរកិច្ចបរាជ័យ» ដែលរៀបចំដោយ JCI នៅក្នុងសាកលវិទ្យាល័យZaman។ «ពេលខ្ញុំចេញធ្វើBusiness (រកស៊ី) ដំបូងខ្ញុំគិតរឿងខាតរួចជាស្រេច..... ខ្ញុំគិតស្រេចថា បើអត់ភ្ញៀវសោះខាតមួយខែប៉ុន្មាន ហើយមានភ្ញៀវប៉ុណ្ណេះខាតប៉ុន្មាន ហើយបើមានភ្ញៀវពេញចំណេញប៉ុន្មាន»។ អ្នកជំនួញរូបនេះបញ្ជាក់។
ការគិតគូររឿងខាតបែបនេះ មិនមែនមានន័យថា វាជាការបង្កើតនូវចំណុចអវិជ្ជមានក្នុងការរកស៊ីនោះទេ ប៉ុន្តែវាជាការគិតគូរយ៉ាងល្អិតល្អន់ ជាពិសេសការរៀបចំផែនការដើម្បីគ្រប់គ្រងហានិភ័យឲ្យរួចរាល់ ដើម្បីជៀសវាងការខកបំណងនៅពេលក្រោយ។ ការគិតតែរឿងចំណេញ ដោយមិនគិតអំពីបញ្ហាប្រឈមនៅពេលដែលអាជីវកម្មនោះអាចទើបប្រទះនូវបញ្ហាណាមួយនោះ វានឹងក្លាយជាចំណុចអាក្រក់មួយ ដែលអាចទាញអង្គភាពអាជីវកម្មទាំងមូលរលាយយ៉ាងរហ័សបំផុត។
លោក ឌិន សុមេធារិទ្ធបញ្ជាក់បន្ថែមថា៖ «ក្មេងៗឥឡូវពេលចេញរកស៊ីអត់គិតរឿងហ្នឹងទេ (រឿងខាត) គិតតែរឿងចំណេញតែម្ដង ដូចចៅចាក់ស្មុគអ៊ីចឹង ដល់ពេលអត់ចំណេញ វ័ណ្ឌក!»។
សូមបញ្ជាក់ថា បច្ចុប្បន្ននេះមានមនុស្សជាច្រើនចាប់ផ្តើមប្រឡូកក្នុងវិស័យជំនួញ ជាពិសេសគឺយុវជន ប៉ុន្តែយ៉ាងណាក៏ដោយ ការខ្វះបទពិសោធន៍ និង ត្រៀមខ្លួនមិនបានល្អ បានធ្វើឲ្យអាជីវកម្មច្រើនគួរសមត្រូវដួលរលំ។
