អាចនិយាយបានថា ២០១៧ ជាសករាជស្មាតហ្វូនទំនើបៗ ត្រូវសម្ពោធបុកគ្នាជាច្រើនម៉ូដែល អមដោយរចនាបថទំនើបទាន់សម័យ គែមអេក្រង់ស្ដើងៗ។ បន្ទាប់ពី Galaxy S8 របស់ Samsung ត្រូវបានសម្ពោធ និងទទួលបានការពេញចិត្តខ្លាំងពីអតិថិជន ក៏មានបណ្ដាក្រុមហ៊ុនផ្សេងៗទៀតនាំគ្នាផលិតទម្រង់ស្មាតហ្វូនគែមអេក្រង់ស្ដើងមិនចាញ់គ្នាប៉ុន្មានទេ។
ចំណែក iPhone ជំនាន់ថ្មី ដែលចេញសម្រាប់ខួប ១០ឆ្នាំនៃត្រកូល iPhone របស់ Apple ក៏ត្រូវរំពឹង មានគែមអេក្រង់ស្ដើង ទំនើបមិនចាញ់ S8 នោះដែរ។ បើតាមលោក Ming-Chi Kuo អ្នកវិភាគពីក្រុមហ៊ុន KGI Securities បានលើកឡើងថា នៅខែកញ្ញាខាងមុខ ក្រុមហ៊ុន Apple អាចត្រៀមដល់ទៅ ៣ម៉ូដែល សម្ពោធដំណាលគ្នា ដែលមាន iPhone 7s, 7s Plus និង iPhone 8 ហើយក៏មានជម្រើសពណ៌ថ្មី និងមុខងារពិសេសអមមកជាមួយ។
សេចក្ដីរាយការណ៍កន្លងមក ឱ្យដឹងថា iPhone 8 នឹងប្រើអេក្រង់ប្រភេទ OLED តែដោយសង្វាក់ផលិតកម្មអេក្រង់មានភាពយឺតយ៉ាវ ដូច្នេះទម្រាំផលិតបានសម្រេច គឺត្រូវពន្យារពេល អាចប្ដូរកាលបរិច្ឆេទប្រកាសពីខែកញ្ញា ទៅខែ តុលាវិញ ។ ប៉ុន្តែរបាយការណ៍របស់អ្នកវិភាគល្បីឈ្មោះ Kuo អះអាងថា iPhone 7s, iPhone 7s Plus និង iPhone 8 នឹងត្រូវសម្ពោធផ្លូវការដំណាលគ្នានៅខែកញ្ញាក្រោយនេះ។ ប៉ុន្តែ បរិមាណផលិត ម៉ូដែល iPhone 8 អាចស្ថិតក្នុងចំនួនកំណត់មួយ ដែលមានត្រឹម ២លានគ្រឿង ទៅ ៤លានគ្រឿងប៉ុណ្ណោះ ដែលនឹងមានសម្រាប់ចរាចរលក់សម្រាប់ត្រីមាសទី៣ នេះ។
លោក Kuo បានបន្តទៀតថា iPhone ថ្មីនឹងមានពណ៌ ៣ជម្រើសដូចជា ពណ៌ខ្មៅ ពណ៌ទឹកប្រាក់ និងពណ៌មាស។ តែបើតាមរូបបែកធ្លាយកាលពីដើមសប្ដាហ៍នេះ បង្ហាញឱ្យឃើញ iPhone មានពណ៌មាសថ្មី ប្រភេទស្ពាន់ copper gold។ iPhone 8 អាចមានអេក្រង់ ៥,១៥អ៊ីញប្រភេទ edge-to-edge OLED កម្រិត 2436x1125px ហើយប្រហែលអាចបំពាក់បច្ចេកវិទ្យាទំនើបមិនធ្លាប់មានគឺ ស្កេនមុខបើកសោ Facial Recognition៕
ប្រែសម្រួល៖ រឹទ្ធិរាជ
ប្រភព៖ techspot
