សុភាសិតដ៏មានតម្លៃរបស់ជប៉ុន៖ «បើដួល៧ដង ត្រូវក្រោកឈរ៨ដង»
«បើដួល៧ដង ត្រូវក្រោកឈរ៨ដង»។ នេះជាសុភាសិតដ៏មានតម្លៃរបស់ជនជាតិជប៉ុន ដែលក្នុងន័យនេះ ពិតជាមានបណ្ដុះនូវផ្នត់គំនិតតស៊ូដល់មនុស្សគ្រប់រូប ក្នុងការខិតខំសម្រេចកិច្ចការឲ្យបាន បើទោះបីជាត្រូវប្រឈមនឹងការលំបាក ឬ ឧបសគ្គប៉ុណ្ណាក៏ដោយ។
ការបរាជ័យ គឺជាផ្នែកមួយនៃជីវិត។ ប្រសិនបើមាននរណាម្នាក់ចេញមុខមកនិយាយថា គេមិនដែលបរាជ័យទាល់តែសោះក្នុងជីវិតនេះ ហើយតែងធ្វើអ្វីជោគជ័យជានិច្ចនោះ មានន័យថា បុគ្គលម្នាក់នោះកំពុងនិយាយកុហក។
រាល់បុគ្គលជោគជ័យអស្ចារ្យក្នុងលោក សុទ្ធតែឆ្លងកាត់រឿងរ៉ាវជូរចត់រាប់ភ្លេច ប៉ុន្តែអ្វីដែលធ្វើឲ្យពួកគេនៅតែអាចចូលដល់ទីតាំងដែលចង់បាននោះ គឺ ដោយសារតែការតស៊ូ ដោយមិនចុះចាញ់ត្រឹមពាក្យថា បរាជ័យ។ មានន័យថា ពួកគេតែងព្យាយាមក្រោកឈរវិញជានិច្ច រាល់ពេលដែលដួល។ ពេលបរាជ័យម្តងៗ មិនមែនមានន័យថា ពួកគេមិនចេះឈឺចាប់នោះទេ ប៉ុន្តែអ្នកទាំងនោះចេះច្នៃការឈឺចាប់របស់ខ្លួនឲ្យក្លាយមេរៀនយ៉ាងសំខាន់ និង ច្នៃវាឲ្យក្លាយជាកម្លាំងចិត្តមួយ ដើម្បីរុញច្រានឲ្យសកម្មភាពនៅតែអាចបន្តទៅមុខជានិច្ច ហើយបានតាំងចិត្តយ៉ាងមុតមាំថា ត្រូវតែសម្រេចវាឲ្យបាន។
នេះជាគន្លឹះសំខាន់ក្នុងដំណើរឆ្ពោះទៅរកភាពជោគជ័យ ក្នុងជីវិត៕
