មេរៀនដ៏មានតម្លៃ ៣យ៉ាង ដែលអ្នកអាចរៀនសូត្របានពីសត្វស្រមោច
សត្វស្រមោចថ្វីត្បិតតែមានមាឌតូច ប៉ុន្តែជាសត្វដែលគេទទួលស្គាល់ថាខ្លាំង។ មិនតែប៉ុណ្ណោះ សត្វស្រមោចក៏ជាសត្វដែលមានការតស៊ូ ខិតខំប្រឹងប្រែងក្នុងការងារនិងពូកែធ្វើការងារជាក្រុមផងដែរ។ ក្រៅពីចំណុចល្អខាងលើនេះ ខាងក្រោមក៏ជាមេរៀនដ៏មានតម្លៃដែលអ្នកអាចសិក្សាបានពីសត្វស្រមោច ដែលមានប្រយោជន៍ដល់ជីវិតនិងការងាររបស់អ្នក៖
១) មិនដែលបោះបង់៖ ជាការពិតណាស់ ប្រសិនជាអ្នកឃើញស្រមោចកំពុងតែពាំយកនូវអាហារហើយអ្នកទៅបិទផ្លូវរបស់ស្រមោចដែលកំពុងធ្វើដំណើរនោះ អ្នកនឹងឃើញថាស្រមោចមិនដែលរាថយឬបោះបង់នោះទេ។ ផ្ទុយទៅវិញ ស្រមោចតែងតែស្វែងរកផ្លូវផ្សេងដើម្បីបន្តដំណើរទៅមុខជានិច្ច។ ក្នុងជីវិតពិតក៏ដូចគ្នាដែរ អ្នកមិនត្រូវឈប់ស្វែងរកដំណោះស្រាយរាល់ពេលដែលអ្នករាំងស្ទះឡើយ។
២) គិតពីរដូវរងានាខែក្ដៅ៖ ដូចដែលអ្នកធ្លាប់បានដឹងពីរឿងនិទានអំពីស្រមោចហើយថាស្រមោចខិតខំប្រឹងប្រែងប្រមូលអាហារស្តុកទុកសម្រាប់រដូវរងាពីព្រោះថានៅខែរងា ស្រមោចមិនអាចទ្រាំនឹងអាកាសធាតុត្រជាក់បានទេ។ និយាយឲ្យសាមញ្ញមានន័យថា ស្រមោចគិតគូរបានវែងឆ្ងាយ។ ដូច្នេះហើយ ពេលរដូវរងាមកដល់ សត្វស្រមោចក៏ពុំជួបបញ្ហាអ្វីដែលគួរឲ្យបារម្ភផងដែរព្រោះពួកគេបានត្រៀមលក្ខណៈរួចរាល់។
៣) ធ្វើឲ្យអស់ពីសមត្ថភាព៖ ស្រមោចមិនត្រឹមតែគិតពីអនាគតឬគិតបានវែងឆ្ងាយនោះទេ ស្រមោចក៏ខិតខំប្រឹងប្រែងធ្វើកិច្ចការនាពេលបច្ចុប្បន្នឲ្យអស់ពីសមត្ថភាពរបស់ពួកគេដែរ។ ដូចអ្វីដែលបានរៀបរាប់ខាងលើ សត្វស្រមោចត្រូវប្រមូលអាហារស្តុកទុកសម្រាប់រដូវរងា។ ប៉ុន្តែ ស្រមោចមិនដែលគិតថាត្រូវប្រមូលទុកត្រឹមតែរដូវរងានោះទេ ពួកគេប្រមូលទុកអាហារតាមដែលពួកគេអាចធ្វើទៅបាន។ នេះជាមេរៀនដ៏ល្អមួយសម្រាប់មនុស្សរាល់គ្នារៀនសូត្រ។ រាល់ពេលដែលអ្នកធ្វើកិច្ចការអ្វីមួយ អ្នកគួរតែធ្វើឲ្យអស់ពីសមត្ថភាព អស់ពីកម្លាំងកាយចិត្ត អ្នកនឹងទទួលបាននូវផលតបស្នងនាថ្ងៃអនាគត៕
ដោយ៖ អឹុង មុយយូ
