ដំបូន្មានមាស ពីបុគ្គលជោគជ័យក្នុងលោក ដែលអាចផ្លាស់ប្តូរជីវិតអ្នកបាន
មនុស្សគ្រប់រូបនៅលើលោកយើងនេះសុទ្ធតែចង់ជោគជ័យក្នុងឆាកជីវិត។ ប៉ុន្តែ សម្រាប់មនុស្សខ្លះ មិនថាពួកគាត់រៀនសូត្របានខ្ពស់យ៉ាងណាក្តី ពួកគាត់នៅតែមិនមានភាពជោគជ័យក្នុងជីវិត។ ឯមនុស្សខ្លះវិញ មិនទាន់បញ្ចប់ការសិក្សាផងក៏អាចជោគជ័យបានដែរ។ ដូច្នេះហើយ ប្រសិនចង់ជោគជ័យក្នុងជីវិត យើងក៏គួរសិក្សាពីមនុស្សជោគជ័យតើកត្តាអ្វីដែលធ្វើឲ្យពួកគាត់ជោគជ័យ។ ខាងក្រោមនេះជាផ្នត់គំនិតដែលបុគ្គលជោគជ័យតែងតែមាន៖
១) «ភាពបរាជ័យគឺជាមេរៀនដ៏ល្អបំផុតដែលអ្នកអាចរៀនសូត្របាន» នេះជាសម្ដីរបស់អ្នកស្រី Oprah Winfrey ដែលជាអ្នករៀបចំកម្មវិធីនិងជាអ្នកសម្ដែងដ៏ល្បីល្បាញផងនោះ។ អ្នកស្រីបានពន្យល់ថាប្រសិនជាអ្នកចង់ជោគជ័យក្នុងឆាកជីវិត អ្នកក៏ត្រូវសុាំនឹងភាពបរាជ័យដែរពីព្រោះភាពបរាជ័យគឺជារឿងជៀសមិនផុត។ ហើយភាពបរាជ័យក៏មិនមែនជាឧបសគ្គរារាំងអ្នកមិនឲ្យជោគជ័យនោះទេប្រសិនជាអ្នកបានរៀនមេរៀនពីភាពបរាជ័យ។ ដូច្នេះហើយ កុំបាក់ទឹកចិត្តរាល់ពេលបរាជ័យម្តងៗ ផ្ទុយទៅវិញ អ្នកគួរតែរៀនសូត្រពីវាឲ្យបានច្រើន។
២) «ដាច់ខាតកុំបោះបង់ឲ្យសោះ» នេះជាសម្ដីរបស់លោក Mark Zuckerberg ដែលជាស្ថាបនិកក្រុមហ៊ុនFacebook។ លោក Mark Zuckerberg បានជំរុញលើកទឹកចិត្តដល់អ្នកខំប្រឹងទាំងឡាយបើទោះបីជាអ្នកពុំទាន់ជោគជ័យនៅថ្ងៃនេះ ចូរកុំបោះបង់ឲ្យសោះពីព្រោះថាប្រសិនជាអ្នកបោះបង់ អ្នកនឹងគ្មានថ្ងៃជោគជ័យឡើយ តែប្រសិនជាអ្នកបន្តខំប្រឹង អ្នកនៅតែមានឱកាស ហើយមានតែការខិតខំប្រឹងប្រែងទេ ដែលអាចនាំអ្នកទៅរកភាពជោគជ័យបាន។
៣) «ត្រូវជឿជាក់លើខ្លួនឯង» នេះជាសម្ដីមាសរបស់លោកស្រី Michelle Obama ដែលជាស្រ្តីមួយរូបដែលតែងតែជំរុញលើកទឹកចិត្តមនុស្សស្រីឲ្យជឿជាក់លើខ្លួនឯងនិងលើកកម្ពស់សិទ្ធកុមារីក្នុងការសិក្សា។ លោកស្រីបាននិយាយថា៖«មនុស្សស្រីអាចសម្រេចកិច្ចការបានដូចមនុស្សប្រុសដែរ អ្វីដែលមនុស្សស្រីត្រូវការគឺការជឿជាក់លើខ្លួនឯង ជឿជាក់ថាខ្លួនឯងអាចធ្វើបាននិងត្រូវមានភាពក្លាហានក្នុងការធ្វើអ្វីមួយ។ មិនថាមនុស្សស្រីមានក្តីសុបិនអ្វីនោះទេ ពួកគេអាចសម្រេចបានទាំងអស់ប្រសិនជាពួកគេគិតថាពួកគេអាចធ្វើបាន៕
ប្រែសម្រួល៖ អ៊ឹង មុយយូ
ប្រភព៖ bornrealist.com
